काठमाडौं - प्रधानमन्त्री पुष्कमल दाहाल ‘प्रचण्ड’ले नेपाली विद्यार्थी विपिन जोशीलाई हमासको नियन्त्रणबाट सकुशल रिहाइमा सघाउन कतारसँग आग्रह गरेका छन्।
नेपालको औपचरिक भ्रमणमा रहेका कतारका विदेश राज्यमन्त्री सुल्तान बिन साद अल–मुरैखीसँग शुक्रबार आफ्नै कार्यकक्षमा भएको भेटमा प्रधानमन्त्रीले त्यस्तो आग्रह गरेका हुन्।
मानवीय सहायता परिचालन तथा बन्धक बनाइएकाको रिहाइका निम्ति कतारको मध्यस्थतामा गाजामा भएको युद्धविरामको प्रधानमन्त्रीले प्रशंसा गर्दै जोशीको रिहाइमा सघाउन अपिल गरे।
त्यस अवसरमा उनीहरूबीच आपसी हित र चासोका विविध विषयका साथै व्यापार, लगानी, विकास सहायता तथा नेपालीलाई कतारमा रोजगारीका अवसर उपलब्ध गराउनेबारेमा छलफल भएको परराष्ट्र मन्त्रालयले जनाएको छ।
प्रकाशित मिति: शनिबार, मंसिर ९, २०८० ०७:३९
प्रतिक्रिया दिनुहोस्
