एजेन्सी– चार दिनका लागि गरिएको अस्थायी युद्धविराम सकिनै लाग्दा यसलाई लम्ब्याउन आफू तयार रहेको हमासले बताएको छ ।
गत शुक्रबारबाट सुरु भएको युद्धविराम आज सकिदै छ । युद्धविराम सकिनै लाग्दा आएको हमासको भनाइमा इजरायलका प्रधानमन्त्री बेन्जामिन नेतान्याहूले थप बन्धकहरूलाई रिहा गर्ने भए युद्धविरामलाई लम्ब्याउन सकिने प्रतिक्रिया दिएका छन् ।
इजरायली अधिकारीहरूका अनुसार हमास र अन्य लडाकु समूहका बन्दुकधारीहरूले दक्षिणी इजरायलमा घातक हमला गर्दा करिब १ हजार २०० व्यक्तिको मृत्यु हुनुका साथै अन्य २ सय ४० जनालाई बन्धक बनाएको अक्टोबर ७ यता गाजा पट्टीमा यो सबैभन्दा लामो युद्ध हो।
इजरायलले हमासले रिहा गर्ने हरेक १० बन्धकका लागि एक दिन युद्धविराम लम्ब्याउने यसअघि नै बताइसकेको छ । गाजा क्षेत्र नियन्त्रण गर्ने हमासले इजरायलको यस प्रस्तावबारे आफ्नो धारणा सार्वजनिक गरेको छैन् ।
हालसम्म हमासले सम्झौता अन्तर्गत ३९ इजरायली बन्धकहरुलाई रिहा गरिसकेको छ भने इजरायलले ११७ प्यालेस्टिनी बन्दीहरुलाई रिहा गरेको छ । गाजाका अन्य १९ बन्धकहरू (१७ थाई, एक फिलिपिनो र एक रुसी–इजरायली दोहोरो नागरिक)लाई पनि हमासले शुक्रबार यता रिहा गरिसकेको छ । नेपालका विपिन जोशी भने अझै पनि हमासकै नियन्त्रणमा छन् ।
