काठमाडौं - इजरायल र प्यालेष्टिनी इस्लामिक लडाकू समूह (हमास) बीच गाजामा युद्धविराम दुई दिन थप भएको छ। चार दिने समयावधि सकिनै लाग्दा इजरायल र हमासबीचको ‘मानवीय विराम’ दुई दिन लम्बिने मध्यस्थकर्ता कतारले जनाएको हो ।
युद्धविराम दुइ दिन थपिएसँगै हमासकाे नियन्त्रणमा रहेका नेपालका विपिन जाेशी पनि छुट्न सक्ने सम्भावना बढेकाे छ । यद्यपी जाेशी छुट्नमा नेपालकाे कुटनीतिमा भर पर्ने छ ।
इजरायल र हमासबीच गाजामा सुरु भएको चार दिने युद्धविराम स्थानीय समय अनुसार मंगलबार सकिँदै थियो। सोमबार युद्धविराम लम्ब्याउने सहमति भएको हो।
कतारी विदेश मन्त्रालयका प्रवक्ता माजेद अल अन्सारीले ट्वीटरमा भनेका छन्, ‘जारी मध्यस्थताको एक भागको रूपमा, गाजा पट्टीमा मानवीय युद्धविरामलाई थप दुई दिन लम्ब्याउने सहमति भएको छ।
यसैबीच, युद्धविरामको एक पक्ष हमासले केही थप शर्तसहित युद्धविराम बिस्तार हुने सूचनालाई पुष्टि गरेको छ।
