अपराजित ललितपुरलाई रोक्दै वीरगन्जले लिगमा खाता खोल्यो

काठमाडौँ– नेपाल सुपर लिग–२ मा अपराजित ललितपुर सिटी फुटबल क्लबलाई बराबरीमा रोक्दै वीरगन्ज युनाइटेड फुटबल क्लबले पहिलो अंक जोडेको छ । 

आज भएको खेलमा ललितपुरलाई २–२ गोलको बराबरीमा रोक्दै वीरगञ्जले लिगमा खाता खोल्दै पहिलो अंक जोडेको हो । ललितपुरको भने यो लगातार तेस्रो बराबरी गर्दै ६ अंक जोडेको छ ।

खेलको १०औं मिनेटमा विलियम ओपोकुको गोलमा वीरगन्जले अग्रता लिएको थियो । सुरुवाती गोलको तीन मिनेटपछि नै इमोह इजीकीएलले गोल गर्दै ललितपुरलाई  खेलको बराबरीमा ल्याए ।

खेलको २७औं मिनेटमा ललितपुरलाई निखिलले वान भर्सेस वान प्रहारमा गोल गर्दै खेलमा २–१ को अग्रता दिलाए । 

दोस्रो हाफमा मैदान छिरेको केहीबेरमै खेलको ५२औं मिनेटमा वीरगञ्जका कृपा कान्त महतोले करिअरको पहिलो गोल गर्दै खेललाई बराबरीमा ल्याए । ओपोकुको ३० यार्ड टाढाबाट लिएको फ्रिकिक क्रसबारमा लागेर फर्किएपछि अनन्त तामाङलाई लागेर कृपाको अगाडी आएपछि महतोले सहजै गोल गर्न सफल भए ।

ललितपुरको ४ खेलमा ७ अंक छ । समान ७ अंक जोडेको धनगढीभन्दा ललितपुर गोल अन्तरमा पछि रहँदै दोस्रो स्थानमा छ । वीरगन्ज १ अंकसहित पुछारमा नै रहेको छ ।