काठमाडौँ– नेपाल सुपर लिग–२ (एनएसएल) मा साविक विजेता र उपविजेता टोली काठमाडौँ रेजर्स र धनगढी एफसीले बराबरी अंक बाँडेका छन् ।
आज दशरथ रंगशालामा काठमाडौँ र धनगढीबीच भएको खेल १–१ को बराबरीमा सकिएपछि दुबैले समान १–१ अंक बाँडेका हुन् ।
खेलको १५औं मिनेटमा धनगढीले खेलमा अग्रता लिन सफल भयो । काठमाडौंका आन्द्रेस नियाले किपरलाई पास दिन खोज्दा अहमद हिजाजीले बलमा पुगेर किपर एन्जल श्रेष्ठमाथि चिप गर्दै पहिलो गोलमार्फत धनगढीलाई अग्रता दिलाए ।
खेलको ६६औं मिनेटमा भने काठमाडौँले खेललाई बराबरी ल्याउन सफल भयो । तोजीदिनोभको क्रसमा किंगे ओलिभरले हेडर मार्फत गोल गर्दै खेल बराबरीमा ल्याए ।
धनगढी अहिलेसम्म लिगमा अपराजित रहँदै ६ खेलमा १२ अंक जोडेर पहिलो स्थानमा छ । काठमाडौं भने ५ खेलमा ९ अंक सहित चौथो स्थानमा यथावत छ ।
प्रकाशित मिति: सोमबार, पुस २, २०८० २०:०८
प्रतिक्रिया दिनुहोस्
