काठमाडौँ– साविक विजेता काठमाडौँ रेजर्स ललितपुर सिटीलाई हराउँदै नेपाल सुपर लिग–२ को प्लेअफमा प्रवेश गरेको छ ।
दशरथ रंगशालामा आज भएको लिग चरणको अन्तिम खेलमा ललितपुर सिटीलाई १–० ले हराउँदै काठमाडौँ तेस्रो स्थानमा रहेर प्लेअफमा प्रवेश गरेको हो ।
पहिलो हाफको थपिएको समयको पहिलो मिनेटमा शोखरुखको प्रहार अनन्तलाई लागेर बाहिरियो । त्यसपछिको कर्नरमा भने काठमाडौँले अग्रता लियो । छोटो कर्नर खेलेर तोजीदिनोभ कोमीवनले खेलेको क्रसमा आन्द्रेस नियाले हेडर मार्फत गोल गर्दै खेलमा काठमाडौँलाई अग्रता दिलाए ।
यस खेलसँगै एनएसएलको लिग चरण पनि समाप्त भएको छ ।
साथै, आजकाे खेलमा हारेको ललितपुर पनि लिगमा चौथो स्थानमा रहेर प्लेअफ पुगेको छ । झापा भने यस नतिजाले पाँचौ स्थानमा रहेर लिगबाट बाहिरिएको छ । ललितपुर, झापा, र बुटवलको समान १०–१० अंक भएपनि ‘हेड टु हेड’मा ललितपुर अघि रहेर प्लेअफ पुगेको हो ।
अब क्वालिफायर खेलमा आगामी सोमबार पोखरा थन्डर्स र धनगढी फुटबल क्लब खेल्नेछन् । पराजित हुने टोलीले भने फाइनल प्रवेशका निम्ती विहीबार एलिमिनेटरको विजेतासँग खेल्नेछ । एलिमिनेटरमा मंगलबार पुनः ललितपुर सिटी एफसी र काठमाडौं रेजर्स नै खेल्नेछन् ।
पोखरा थन्डर्स १४ अंकसहित लिगको शीर्षस्थान तथा धनगढी १३ अंक जोड्दै दोस्रो स्थानमा रहेर क्वालिफायरमा स्थान बनाउन सफल भयो । तेस्रो स्थानमा काठमाडौं रेजर्स र चौथो स्थानमा ललितपुर सिटी रहेका छन् ।
