काठमाडौं– विमानस्थलमा १४ किलो सुन पक्राउपछि गर्रिएको छानबिनका क्रममा उक्त समूहले १३८ किलो सुन भित्राइसकेको निचोड निकालिएको छ।
त्रिभुवन विमानस्थल भन्सार कार्यालयको छानबिन समितिले मीनबहादुर घले र उनको समूहले १३८ किलो सुन तस्करी गरिसकेको तर १४ किलो मात्र समातिएको निचोड निकालेको हो।
भन्सार कार्यालयले १४ किलो सुनसहित मंसिर २२ गते घलेलाई समातेको थियो ।
दुबईमा रहेका अंकित अग्रवालसँगको सम्पर्कमा घलेले नेपालमा सुन तस्करी गर्दै आएका थिए । सो क्रममा घले, चन्द्र आले र कृष्णकुमार श्रेष्ठले जम्मा १३८ केजी सुन ल्याएर विमानस्थलबाट सेटिङ मिलाएर बाहिर ल्याइसकेका समितिले जनाएको छ।
एयरपोर्टमा डीबी भन्ने दनबहादुर गुरुङले सेटिङ मिलाउँथे । नागरिक उड्ययन कार्यालय, गौचरका एसी मेकानिक राधाकृष्ण श्रेष्ठ, कार्यालय सहयोगी लेकबहादुर तामाङ, करारका पूर्व कर्मचारी रमेश देउला, एसी शाखामा काम गर्ने कार्यालय सहयोगी अनिल श्रेष्ठ र प्लम्बर शेरबहादुर बस्नेतले तस्करीको सुन पैठारी र निकासीका लागि सहयोग गर्दै आएका थिए।
