काठमाडौं– सहकारी ठगी प्रकरणमा बिख्यात भएका गितेन्द्रबाबु राई (जीबी)सहितका केही व्यक्तिलाई नेपाल प्रहरीले चाँडै पक्राउ गर्ने भएको छ ।
नेपालका विभिन्न स्थानमा खोजी गरेको नेपाल प्रहरीले जीबीलाई पत्ता लगाउन नसकेपछि विदेश भागेको आशंका गरेको छ ।
यसैकारण जिल्ला प्रहरी कार्यालय कास्कीले प्रहरी प्रधान कार्यालयको इन्टरपोल शाखालाई पत्राचार गरी डिफ्युजन नोटिसका लागि अनुरोध गरेको छ । जीबी ग्यालेक्सी टेलिभिजनका अध्यक्ष हुन् ।
करिब १० महिनादेखि ग्यालेक्सीमा कार्यरत पत्रकारले तलब पाएका छैनन् । यता सेटिङ मिलाएर राई फर्किने तयारीमा रहेका बेला सूर्यदर्शनदेखि सहारा सहकारी ठगीसम्मका विवरण सतहमा आएपछि उनी थप दबाबमा परेका छन् ।
राई विदेशमा रहेको सूचना प्रहरीले पाएका कारण अब इन्टरपोलमार्फत डिफ्युजन नोटिस जारी गरेर पक्राउको तयारी भएको उच्च स्रोतले जानकारी दियो ।
फरार अभियुक्त पक्राउका लागि गरिने नोटिसलाई ‘डिफ्युजन’ भनिन्छ । अपराधी करार नभएको तर फरार रहेकालाई पक्राउका लागि विदेशी प्रहरीको सहयोग वा जानकारीका लागि यस्तो नोटिस जारी हुने गरेको छ ।
अदालतबाट दोषी करार भई फरार रहेकालाई भने रेडकर्नर नोटिस जारी गरिन्छ । जीबी राईसहितका सहकारी सञ्चालक फरार मात्र रहेका कारण डिफ्युजन नोटिस जारी हुन लागेको हो । नेपाल प्रहरी प्रधान कार्यालयले पत्राचार गरेपछि इन्टरपोलले यस्तो नोटिस जारी गर्नेछ ।
