धरान– श्रमदान गरी धरानवासीको तिर्खा मेट्ने काममा सक्रिय रहेका कारण चर्चा कमाएका मेयर हर्क साम्पाङ बेलामौका विवादीत अभिव्यक्तिका कारण ल्यामलाइटमा रहने गरेका छन् ।
धरान–इटहरी सीमा, निजी जग्गामा वृक्षारोपण, मन्दीर अगाडि चर्च खडा हुँदा अदालत जानू भन्ने अभिव्यक्तिले मात्र होइन, काठमाडौंमा आफू पुगेपछि फोहोर उठेको भन्ने जस्ता टुक्काले साम्पाङ विवाद र चर्चामा रहने गरेका थिए ।
पछिल्लो पटक राजनीतिक दल खोल्दा के हुन्छ भन्ने विकल्प प्रस्तुत गरेका साम्पाङ धरानमा विमानस्थल बनाउने विषयको चर्काचर्कीले पनि चर्चामा थिए ।
यीभन्दा फरक प्रसङ्गमा साम्पाङ फेरि चर्चामा छन् । उनले सामाजिक सञ्जालमार्फत विहीबारबाट राष्ट्रपति रामचन्द्र पौडेल र प्रधानमन्त्री पुष्पकमल दाहाल प्रचण्डको तस्बिर धरान उपमहानगरपालिकाको आफ्नो कार्यकक्षबाट हटाउने घोषणा गरे । यति मात्र होइन, उनले किराँती राजा यलम्बरको तस्बिर राख्ने घोषणा गरेका छन् ।
केन्द्रीय सत्तालाई चेतावनीका साथ बुधबार उनले सामाजिक सञ्जालमा लेखे,‘भोलि म राष्ट्रपति र प्रधानमन्त्रीको फोटो हटाएर यलम्बरको फोटो राख्दैछु । जुन दिन केन्द्रले धरानलाई महत्व दिन्छ त्यो दिन पुनः उनीहरुको फोटो टाँस्नेछु ।’
त्यसो त कार्यकक्षमा यलम्बरको तस्बिर राख्दा आपत्ति हुने विषय नै होइन । तर, राष्ट्रपति र प्रधानमन्त्रीको हटाउने विषयचाहिँ विवादीत अभिव्यक्ति भएको कतिपय नेता कार्यकर्ताले बताएका छन् ।
कार्यकक्षमा कार्यालय प्रमुखले चाहेको तस्बिर राख्न पाउँछ। काठमाडौं महानगरपालिकाका मेयर बालेन्द्र शाहले ग्रेटर नेपाल, पृथ्वीनारायण शाहको तस्बिर राखेका छन् । यसबाहेक नेपाली सेनाका प्रधानसेनापतिको कार्यकक्षमा पनि पृथ्वीनारायण शाहको तस्बिर राखिएको छ ।
यसबाहेक मधेस प्रदेश प्रमुख रहेका बेला डा. राजेश अहिराजले पनि पृथ्वीनारायण शाहको तस्बिर राखेका थिए । साम्पाङले यलम्बरको तस्बिर राख्छु भन्नु अनुपयुक्त होइन । यलम्बर किराँतीका प्रथम राजा थिए ।
किराँतीहरूको रहनसहन, व्यापारदेखि रीतिथिति बसाउने यलम्बरका अनेक योगदान रहेका छन् । यलम्बर महाभारतकालिन बर्बरीकको अवतार पनि मानिन्छन् । बर्बरिक महाभारतका पात्र भिमका नाती घटोत्कचका पुत्र भनि चित्रण गरिएको छ ।
काठमाडौं उपत्यका गोपाल बंश राजालाई पराजित गरी राज्य स्थापित गर्ने पहिलो ठूलो किराँत राजाका रुपमा यलम्बरको ऐतिहाँसिक परिचय पनि छ । यलम्बरको उत्तराधिकारिहरूले लगभग १९०३ वर्ष ८ महिना लामो ३१ पुस्तासम्म काठमाडौंमा शासन गरेको भनी चर्चा हुने गरेको छ । सुनुवार, राई, लिम्बु, याक्खा आदि इत्यादी किराँती राजाका सन्तानका रुपमा परिचित छन् ।
उनै यलम्बरको तस्बिर राख्ने घोषणा गरी साम्पाङ फेरि चर्चामा रहेका छन् ।
