काठमाडौं - इङ्लिस प्रिमियर लिग फुटबलमा लिभरपुलले न्युक्यासल युनाईटेडलाई हराएको छ । सोमबार लिभरपुलले एनफिल्ड मैदानमा न्युक्यासलमाथि ४–२ को शानदार जित निकालेको हो । लिभरपुलको जितमा मोहमद सलाहले दुई तथा जोन्स र गाक्पोले समान एक एक गोल गरे । न्युक्यासलका अलेक्जेन्डर इसाक र स्वेन बोटमेनले एक एक गोल फर्काए ।
सलाहले सुरुवातमै अग्रताको अवसर गुमाएका थिए । उनको पेनाल्टी प्रहार असफल बनेको थियो । इजिप्टबाट अफ्रिका कप अफ नेसन्स खेल्न जान लागेको सलाहलेनै दोस्रो हाफको सुरुवातमा गोल गर्दै लिभरपुललाई अग्रता दिलाएका थिए । उनले प्रिमियर लिगमा लिभरपुलका लागि १ सय ५० औं गोल गरे । त्यसको पाँच मिनेटमा पाहुना टोली न्युक्यासलका इसाकले खेल बराबरीमा ल्याएका थिए ।
न्युक्यासलबाट निरन्तर दबाब बनाएको लिभरपुलका लागि जोन्स र गाक्पोले गोल गर्दै लिभरपुललाई ३–१ को अवस्थामा पुर्याएका थिए । तर बोटमेनले ८१ औं मिनेटमा हेडमार्फत न्युक्यासललाई खेलमा फर्काउने कोशिश गरे ।
खेल सकिन ४ मिनेटअघि सलाहले पेनाल्टीमा गोल गर्दै लिभरपुललाई ४–२ को शानदार जित दिलाए । लिभरपुलले प्रिमियर लिगका सुरुवाती ७ खेलमा जित निकालेको थियो । तर उसले म्यानचेस्टर युनाईटेड र आर्सनलसँग दुई होम म्याच बराबरी खेल्यो ।
लिभरपुलले ४५ अंक सहित शीर्ष स्थानमा उक्लियो । उसले दोस्रो स्थानको एस्टन भिल्लासँग ३ अंकको अग्रता लियो । न्युक्यासल २९ अंक सहित तालिकाको नवौं स्थानमै रह्यो ।
