राष्ट्रियसभामा भागबन्डा नमिलेपछि बैठक छाडेर हिंडे डा.शेखर

काठमाडौँ– राष्ट्रियसभा सदस्यको निर्वाचनमा उम्मेदवार टुंगो लगाउन बसेको नेपाली कांग्रेस केन्द्रीय कार्यसम्पादन समितिको बैठकबाट नेता डा. शेखर कोइराला भने बाहिरिएका छन् । 

सत्ता गठबन्धनमा भएको भागबन्डामा पाएको १० मध्ये ४ सिट आफ्नो समूहले नपाउने भएपछि  पार्टी कार्यालय, सानेपामा जारी बैठकबाट नेता डा. कोइराला बाहिरिएका हुन् । 

बैठकमा सहभागी एकजनाले दिएको जानकारी अनुसार डा. शेखर–गगन थापा समूहले ४ सिट आफ्नो समूहले पाउनुपर्नेको मागमा  सभापति शेरबहादुर देउवाले तीन सिट लिन भनेका छन् ।  यसअघि डा. शेखर–गगन थापा समूहले चार सिट नपाए उमेदवारी नदिने निर्णय गरेको थियो । 

“१० सिट नदिए पार्टी मिलाउन सक्दिनँ भनेर गठबन्धनमा सहमति गर्ने र सिट लिने । अनि हामीले मागेको चार सिट दिन्न भन्न मिल्दैन,” बैठकमा सहभागी नेता बलबहादुर केसीले भने, “सोही कुरा कार्यसम्पादन बैठकमा राख्छौँ । चार सिट नपाए हामी उमेदवारी दिने प्रक्रिया अघि बढाउदैनौँ ।”

११ माघमा हुने राष्ट्रियसभा निर्वाचनका लागि सोमबार उम्मेदवार मनोनयनको कार्यतालिका छ ।