काठमाडौँ– अमेरिका पठाइदिन्छु भनी साढे २३ लाख रुपैयाँ ठगी गरेको आरोपमा एक महिलालाई प्रहरीले पक्राउ गरेको छ ।
अमेरिका पठाइदिन्छु भनी ठगी गरेको आरोपमा काठमाडौं बुढानिलकण्ठ नगरपालिका–६ भंगाल चपली बस्ने ३४ वर्षीया बेन्जु महतलाई काठमाडौँ उपत्यका अपराध अनुसन्धान कार्यालयको टोलीले आज भंगाल चपलीबाट पक्राउ गरेको हो ।
कार्यालयका प्रवक्ता प्रहरी उपरीक्षक रवीन्द्र रेग्मीका अनुसार महतले अमरबहादुर पुनलाई वैदेशिक रोजगारीका लागि अमेरिका पठाइदिन्छु भनी २३ लाख ५० हजार रुपैयाँ ठगी गरेको आरोप छ ।
अमेरिका पुगेपछि प्रतिष्ठित कम्पनीमा काम लगाइदिने र तलब मासिक ४ लाख हुने भनी विश्वास दिलाएर रकम ठगी गरेको उजुरी परेपछि महतलाई पक्राउ गरिएको उपरीक्षक रेग्मीले बताए । पटक–पटक गरेर रकम लिएपछि फरार भएकी महतविरूद्ध पीडितले कार्यालयमा उजुरी दिएका थिए ।
महतलाई थप अनुसन्धान तथा कारबाहीको लागि वैदेशिक रोजगार विभागमा पठाइएको छ ।
