२१ बर्षपछि सीआईबीले समात्यो पत्नी हत्यारा, ज्यान जाला प्रहरीले छाड्दैन

काठमाडौं– आफ्नी पत्नीको हत्या गरी २१ बर्षदेखि फरार रहेका एक व्यक्तिलाई प्रहरीको केन्द्रीय अनुसन्धान ब्युरो (सीआईबी)ले पक्राउ गरेको छ ।

२०५९ साल फागुन २८ गते सूर्यबहादुर दवाडीले अंशसम्बन्धी विवादमा पत्नी सानुमाया दवाडीलाई कुटपिट गर्दै घाँटीमा नाम्लोले कसेर हत्या गरेका थिए ।

धादिङको तत्कालिन मैदी–९ हाल ज्वालामुदी गाउँपालिका १ का सूर्यबहादुरले पत्नी सानुमायाको हत्यापश्चात सदगद समेत गरेका थिए । जिल्ला अदालत धादिङले २०६१ जेठ ५ गते सर्वस्वसहित जन्मकैद सुनाएपछि उनी फरार थिए ।

सर्वोच्च अदालतले जिल्ला अदालतको फैसला सदर गर्दा सूर्यबहादुर फरार भई भारतका विभिन्न स्थानमा लुकेर बसेका थिए । उनी नेपाल प्रवेश गरेको भन्ने सूचनाका आधारमा सीआईबीले रुपन्देहीको सद्धार्थनगर–१ बेहलियाबाट सोमबार पक्राउ गरी थप कारबाहीका लागि जिल्ला अदालत धादिङ पठाएको छ ।

हत्या गरेको र फैसला भएको लामो समयपछि पक्राउ नपर्ने ठानेर सूर्यबहादुर नेपाल छिरेका थिए । तर, प्रहरीको खोजी सूचीमा रहेका ७० बर्षीय उनलाई सीआईबीले कानुनी कारबाहीका लागि पठाइसकेको छ ।