काठमाडौँ– सरकारले संघीय संसदको अधिवेशन माघ तेस्रो साता बोलाउने तयारी गरेको छ । 

संघीय संसद सचिवालयले मंगलबार कानुन, न्याय तथा संसदीय मामिलामन्त्री धनराज गुरुङ र सभामुख देवराज घिमिरेबीच भएको संसद अधिवेशनको मिति, विधेयकहरुको अवस्था र संसदीय क्यालेन्डरको विषयमा छलफल भएको बताएको छ ।

छलफलपछि मन्त्री गुरुङ गुरुङले आगामी माघ १८ गते अधिवेशन बोलाउने सरकारको तयारी रहेको सभामुखलाई जानकारी गराएको जानकारी दिए । छलफलमा सभामुख घिमिरेलाई सरकारले केही विधेयकहरु संसदमा दर्ता गर्ने प्रक्रियामा रहेको जानकारीसमेत दिएको  गुरुङले बताए ।

संसद सचिवालयका अनुसार सभामुख घिमिरेले संसदीय क्यालेण्डर बनाएर संसद चलाउने आफूहरुको तयारी रहेको र त्यसमा सहयोग हुने गरी सरकारको भूमिकाको अपेक्षा गरेको बताएका छन् । सातामा ३ दिन प्रतिनिधि सभाको बैठक चलाउने र बाँकी ३ दिन संसदीय समितिको बैठकका लागि समय छुट्याउने गरी तालिका प्रस्ताव गर्ने सभामुख घिमिरेको तयारी रहेको  सचिवालयको भनाई छ ।