बिराटनगर– ‘जसरी पनि नेता कृष्ण सिटौलालाई गठबन्धनका तर्फबाट भारी मतभारले जिताउनुपर्छ’, डा. शेखर कोइरालाको निवासमा बुधबार बिहान चियाको चुस्कीसँगै कांग्रेसका अन्य नेता भनिररहेका थिए । राष्ट्रिय सभा निर्वाचनको पूर्वसन्ध्यामा अहिले बिराटनगरमा हाइप्रोफाइल नेताको जत्था नै सक्रिय छ। 

बिहीबार राष्ट्रिय सभाको १९ सिटका लागि हुने निर्वाचनमा कोशी प्रदेशबाट कांग्रेसका सिटौला हेवीवेट उम्मेदवार मानिन्छन् । प्रतिनिधि सभामा झापा–३ बाट पराजित भएका सिटौलालाई जिताउने मात्र होइन, राष्ट्रिय सभाको अध्यक्ष नै बनाउने चर्चा बिराटनगरमा छ । 

‘उहाँलाई उचित सम्मानका साथ जिताएर राष्ट्रिय सभाको नेतृत्वका लागि पठाउने हो’, कोइराला निवासमा स्थानीय कांग्रेस नेताले भने,‘सिटौला त कांग्रेसका खम्बा, गिरीजाप्रसाद कोइरालाले पत्याएको शान्तिदूत पो हो त ।’

चारतिर फर्किएका कांग्रेसका प्रायः नेता बिराटनगरमा छन्। डा. शेखर कोइराला, महामन्त्री गगन थापा, पूर्वमन्त्री ज्ञानेन्द्रबहादुर कार्कीलगायतका नेता भेला भएका हुन् । तर कतिपय कांग्रेसका झापाका प्रतिनिधि भने सिटौलालाई जिताउने कुरामा विकल्प नभए पनि त्यो भावी राजनीतिका लागि थन्क्याएको पनि मान्छन् ।

एक जनाले भने,‘राष्ट्रिय सभामा अध्यक्षको पद दिएर आगामी महाधिवेशनमा दाबेदारीबाट अलग बनाउने खेल र राजनीति पनि लुकेको छ, यहाँ ।’

गत महाधिवेशनमा प्रतिस्पर्धी र आलोचक रहेका महामन्त्री थापा नै सक्रियताका साथ लागेका छन्। ‘आगामी बाटो क्लियर गराउनका लागि यो खेल भएको हो’, स्थानीय नेता भन्छन्,‘पहिला हराएर चेत खुवाइयो, अब जिताएर थन्क्याउने कुरा छ ।’

राष्ट्रिय सभाका लागि कोशीमा दुई उम्मेदवार छन् । कांग्रेससहितको सत्ता गठबन्धन एकातिर छ भने अर्कातिर प्रतिपक्षी नेकपा एमाले र राप्रपाको पनि सहकार्य भएको छ ।