काठमाडौँ– काठमाडौँ महानगरपालिकाका प्रमुख बालेन्द्र शाह (बालेन) र नेपालका लागि संयुक्त राज्य अमेरिकाका राजदूत डीन आर. थम्प्सनबीच भेटघाट भएको छ ।
प्रमुख बालेनले आज आफ्नै कार्यकक्षमा राजदूत थम्प्सनसँग भेटघाट गरेका हुन् । भेटघाटमा आपसी विषयमा कुराकानी भएको महानगरले जनाएको छ ।
भेटका क्रममा प्रमुख शाहले भने, ‘आपसी कार्यक्रमका रुपमा हामीले आइटी (सूचना प्रविधि)को तालिम चलाउन सक्छौँ । यसबाट अमेरिकन कम्पनीले कामका लागि जनशक्ति पाउँछन् । नेपाली युवाहरूले आय आर्जन गर्न पाउँछन् । यससँगै उनीहरु विश्वबजारका लागि दक्ष जनशक्ति बन्न सक्छन् ।’
राजदूत थम्प्सनले सिर्जनात्मक कार्यक्रमहरुमा सहभागी हुन अमेरिकाकातर्फबाट विज्ञ, व्यापारिक, सामाजिक तथा नागरिक तहको सम्बन्ध बढाउन सहजीकरण गर्न सकारात्मक रहेको बताए ।
थम्प्सनले प्रमुख शाहलाई अमेरिका भ्रमणको निमन्त्रणासमेत दिएका छन् ।
