काठमाडौँ– एथलेटिक्सका दीपक अधिकारी एनएसजेएफ पल्सर स्पोर्ट्स अवार्ड–२०७९ को पुरुष वर्ष खेलाडी घोषित भएका छन् । 

नेपाल खेलकुद पत्रकार मञ्च (एनएसजेएफ)ले आइतबार आयोजना गरेको कार्यक्रममा दीपक पुरुष वर्ष खेलाडी घोषित भएका हुन् ।

उनले क्रिकेटका रोहितकुमार पौडेल र आसिफ सेखलाई पछाडि पारे । उनी १६ औं एशियाली क्रसकन्ट्री दौडमा दुई स्वर्ण विजेता हुन् ।

यस्तै, एथलेटिक्सकै राजपुरा पछाई महिला वर्ष खेलाडी घोषित भएकी छन् । उनले एथलेटिक्सकै पुष्पा भण्डारी र बास्केटबलकी अनुसा मल्ललाई पछि पारिन् ।

गोल्छा ग्रुपका निर्देशक अभिमन्यु गोल्छाले दीपकलाई अवार्ड प्रदान गरे । राष्ट्रिय खेलकुद परिषद् (राखेप)का सदस्यसचिव टंकलाल घिसिङले राजपुरालाई अवार्ड प्रदान गरे । वर्ष उत्कृष्ट खेलाडीद्वय दीपक र राजपुराले बजाज पल्सर एन २५० मोटरसाइकल पुरस्कार पाए ।

यस्तै टेबल टेनिसकी खेलाडी सिक्का सुवाल श्रेष्ठले पिपुल्स च्वाइस अवार्ड जितिन् । ईसेवाको भोटिङ, मञ्चका सदस्यको मत, फेसबुक लाइक र प्रमुख प्रशिक्षकको मतका आधारमा सिक्का विजेता भएकी हुन् ।

वर्ष उत्कृष्ट प्रशिक्षक पनि एथ्लेटिक्सकै प्रशिक्षक चन्द्र गुरुङ घोषित भए । यो अवार्ड विजेता गुरुङले पनि पल्सर एन १६० मोटरसाइकल पाए ।

यस्तै युवा वर्ष खेलाडी क्रिकेटका देव खनाल घोषित भए । खनालले २०२४ को आइसिसी यु–१९ विश्वकप क्रिकेट छनोट गराउन सफल कप्तान हुन् । देवकै कप्तानीमा नेपालले युएईलाई फाइनलमा हराउँदै एशिया छनोटको उपाधि जित्न सफल भएको थियो ।

यस्तै पारा एथ्लिट अवार्डबाट मैयाँ बिसुङ्खे सम्मानित भइन् । उनले ट्रफीसँगै ५० हजार रुपैयाँ नगद पुरस्कार पाइन् । उनी सन् २००६ देखि पारा खेलकुदमा सक्रिय छन् । लाइफ टाइम एचिभमेण्ट अवार्ड पहिलो ओलम्पियन एवं भारोत्तलक राजेन्द्रकुमार प्रधानले प्राप्त गरे ।