काठमाडौँ– नेपाल प्रहरीले अमेरिका लैजान भन्दै नेपाल ल्याएर भारतीयहरुलाई बन्धक बनाएर राख्ने समूहलाई पक्राउ गरेको छ ।
जिल्ला प्रहरी परिसर काठमाडौँले बिहीबार पत्रकार सम्मेलन गर्दै अमेरिका पठाउने भन्दै दुवई कतार र भारतको नयाँ दिल्लीबाट बोलाएर ११ जना भारतीयलाई बन्धक बनाउने ८ जनालाई पक्राउ गरि सार्वजनिक गरेको हो ।
अमेरिका पठाउने प्रलोभन देखाएर उनीहरुलाई नेपाल बोलाइएको खुलेको प्रहरीले जनाएको छ । उनीहरुले नक्कली बोडिङ पास, छाप नक्कली बनाएको फेला पारेको जिल्ला प्रहरी परिसर काठमाडौँका एसएसपी भुपेन्द्र खत्रीले बताए । पक्राउ पर्नेमा भारतीय नागरिकहरु अब्दुल रहिम, इन्दुसिंह यादव, चरणजित सिंह, अशोक कुमार, मनिषकुमार मल्होत्रा, निपुन गुप्ता, मोहम्मद सविर मिया र नेपाली नागरिक रामचन्द्र शर्मा रहेको उनले बताए । उनीहरुले बन्धकमा राखेर चरम यातना दिएको अनुसन्धानबाट खुलेको खत्रीले जानकारी दिए ।
पक्राउ गरिएका मध्ये नेपाली नागरिकले भारतीयहरुलाई रातोपुलमा राख्ने व्यवस्था गरेका थिए । अमेरिका जान पीडितहरूले ४५ लाख भारतीय रुपैयाँसम्म दिएको खुलेको छ ।
