कल्पना गर्नुहोस् त, दशरथ रंगशालामा कुनै सांगीतिक कन्सर्ट भएको होस् । त्यसमा कति दर्शकहरू उपस्थित होलान् ? १० हजार, २० हजार वा ४० हजार ? नेपालमा त्यसमा पनि राजधानीमा हुने सांगीतिक गतिबिधिहरू एकदमै सिमित हुँदै गइरहेका छन् । ति कुनै रेस्टुरेन्ट र पबहरूमा मात्र हुने गरेका छन् । यसैले वर्तमान अवस्थालाई मध्यनजर गर्दा तपाईले माथिको प्रश्नमा धेरै अनुमान गर्नु भयो भने ४० हजारसम्म दर्शकको उपस्थितिको अनुमान गर्न सक्नुहोला ।
तर यो तस्विरमा देखाइएको कन्सर्टमा हामीले कल्पना गरे भन्दा बढि दर्शकहरू उपस्थित भएका थिए । सो कन्सर्टमा ६० हजार दर्शक उपस्थित भएको भनेर तत्कालिन अन्तराष्ट्रिय मिडियाहरूले समाचार लेखेका थिए । यो कन्सर्ट २०३६ सालमा भएको थियो र यसमा सो समयको चर्चित जापानी रक ब्यान्ड गोडिएगोले आफ्नो सांगीतिक प्रस्तुति दिएको थियो ।
त्यो कन्सर्टलाई राज्यले पनि विशेष कार्यक्रम मानेको थियो । यसैले त्यसमा बिजुली पर्याप्त पुर्याउन शहरव्यापी विद्युत कटौती (लोडसेडिङ) गरिएको थियो । कन्सर्टमा सहभागी हुन र त्यसको प्रभाव विस्तार गर्न बैंक तथा कार्यालयहरू बिदा दिइएको थियो ।
जापानी रक ब्यान्ड गोडिएगोले आफ्ना चर्चित गीतहरू गाएका थिए । त्यो बेला नेपालमा रक संगीतहरू प्रचलित थिएनन् । तर त्यो कन्सर्टमा आएका मानिसहरूको संख्याले त्यो ऐतिहासिक सांगीतिक कार्यक्रम बन्यो । नेपालमा रक संगीतलाई बलियो बनाउन त्यो कन्सर्टको ठुलो भुमिका रहेको त्यतिबेलाका संगीतका पारखीहरू बताउँछन् ।
