नेपाली फुटबलर सावित्रा भण्डारी युरोपियन क्लबको आजको खेलमा पहिलो रोजाइमा परेकी छिन् । फ्रान्सको प्रसिद्ध ए डिभिजन महिला टिम एन एभान्त गुइनग्याम्पमा अनुबन्धित भएकी भण्डारी यस अगाडि दोस्रो रोजाइकारूपमा सब्सिच्युट खेलाडि भएर मैदान प्रवेश गर्थिन् ।
मार्च २ मा लिले ओएससीसँग भएको खेलमा सावित्रा भण्डारी खेलको ८६ औँ मिनेटमा मैदान प्रवेश गरेकी थिइन् । थपिएको समयको ९१ औँ मिनेटमा गोल गर्दै उनले आफ्नो क्लब गुइनग्याम्पलाई दुई शुन्यको सहज जीत दिलाएकी थिइन् ।
सोही खेलबाट प्रभावित भएर आजको खेलमा सावित्रालाई पहिलो ११ को रोजाइमा मैदान प्रवेश गराएको हो ।
आजको खेलमा सावित्राको क्लब एन एभान्त गुइनग्याम्पले पेरिस एफसीसँग प्रतिष्पर्धा गर्दैछ । १६ खेल खेलेको पेरिस एफसी अंक तालिकामा ३५ अंकसहित तेस्रो स्थानमा छ भने सावित्राको क्लब १७ खेल खेल्दै १६ अंकसहित तालिकाको आठौँ स्थानमा छ ।
एन एभान्त गुइनग्याम्पले पेरिस एफसीसँग खेलेको पछिल्ला ३ कुनै पनि खेलमा जीत निकाल्न सकेको छैन ।
