चौधरी ग्रुपद्वारा सञ्चालित सीजी फुड्स पार्क, भैंसेपाटीमा एक समूहले आक्रमण गरेको छ । शुक्रबार दिउँसो ३ बजेतिर बस रिजर्भ गरेर आएको समूहले आक्रमण गरेको हो ।
बा ४ ख १०८५ नम्बरको बसमा आएको समूहले फुड्स पार्कमा कार्यरत कर्मचारीमाथि हातपात गर्नुका साथै भौतिक सम्पत्तिमाथि तोडफोड गरेको चौधरी ग्रुपले बताएको छ । महिला कर्मचारीमाथि समेत हातपात हुन थालेपछि केहिबेर दोहोरो झडपको स्थिति बनेको थियो । तोडफोडमा उत्रिएका २४ जनालाई भैंसेपाटी प्रहरी वृत्तबाट गएका प्रहरीले नियन्त्रणमा लिएको छ ।
फुड्स पार्कमा प्रवेश गरेका उनीहरुले सरकारविरुद्ध नाराबाजी गर्दै चौधरी ग्रुपका व्यवस्थापकहरूप्रति अभद्र एवं असभ्य व्यवहार प्रदर्शन गरेका थिए । गाडी नै रिजर्ब गरेर आएको समूह मेडिकल व्यवसायी भनिने दुर्गा प्रसाइबाट सञ्चालित रहेको आशंका गरिएको छ ।
चौधरी समूहले घटनाको निन्दा गरेको छ । देशको प्रमुख औद्योगिक घरानाद्वारा सञ्चालित उद्योगमाथि भएको आक्रमण निन्दनीय रहेको चौधरी ग्रुपले जनाएको छ । यस्ता घटनाले देशको औद्योगिक वातावरणमा नराम्रो असर पर्ने चौधरी ग्रुपको भनाइ छ ।
चौधरी ग्रुपले प्रकाशित गरेको विज्ञप्ति
