काठमाडौँ - अरनिको राजमार्गअन्तर्गत भक्तपुरको हनुमन्ते खोलामा सार्वजनिक जग्गा अतिक्रमण गरी निजी ड्राइभिङ सेन्टर सञ्चालन भएको पाइएको छ ।
हनुमन्ते खोलाको पानी बग्ने रिभर कोर्स अतिक्रमण गरेर ईजी ड्राइभिङ ट्रेनिङ सेन्टर सञ्चालन हुँदै आएको हो । हनुमन्ते खोलामा बनेको पुलको दायाँ किनारमा सार्वजनिक जग्गा अतिक्रमण गरी उक्त ड्राइभिङ ट्रेनिङ सेन्टर सञ्चालन भएको हो ।
पुलको एउटा स्पान नै कभर हुने गरी पानी बग्ने रिभर कोर्स अतिक्रमण गरेको पाइएको छ । पानीको बहाव नै परिवर्तन गर्ने गरी अतिक्रमण गरेर बनाइएको संरचनाले पुल नै जोखिममा परेको हो । पानीको बहाव परिवर्तन हुँदा पूर्वपट्टिको किनारमा गम्भीर क्षति पुगेको छ । जसले पुलको संरचना नै जोखिममा परेको छ ।
राष्ट्रिय सतर्कता केन्द्रले उक्त पुलको प्राविधिक परीक्षण गर्दा अतिक्रमणका कारण पुल नै जोखिम अवस्थामा रहेको पाइएको हो । खोलाको पानी बग्ने रिभर कोर्स अतिक्रमण गरेर ड्राइभिङ सेन्टर सञ्चालन भएको, दर्जनौँ कच्ची र पक्की घरहरू निर्माण भएको सतर्कता केन्द्रको प्राविधिक परीक्षण प्रतिवेदनमा उल्लेख छ ।
सतर्कता केन्द्रका अनुसार अतिक्रमणका कारण निर्माण गरिएका टेवा पर्खाल (ग्याब्लियन वाल)सहितका अन्य संरचनामा गम्भीर असर परेको छ । खोलाको दायाँपट्टिको भाग अतिक्रमण गरी पानीको प्राकृतिक बहावलाई परिवर्तन गरेर पूर्वपट्टिको किनारालाई समेत क्षति पुर्याइएको केन्द्रले जनाएको छ ।
सतर्कता केन्द्रले अरनिको राजमार्गमा निर्मित ३३ वटा पुलको प्राविधिक परीक्षण गरेको थियो । जसअन्तर्गत हनुमन्ते खोलाको पुल जोखिमपूर्ण अवस्थामा रहेको सतर्कता केन्द्रको प्राविधिक परीक्षण प्रतिवेदनबाट खुलेको हो ।
