दोलखा– जिल्लामा यस वर्ष असारको १५ बितिसक्दा पनि सहज रूपमा धान रोपाइँ हुन नसकेको पाइएको छ।
असार महिना विशेष गरी धान रोप्ने समय हो । असारको अन्तिम सातासम्म प्रायः जसो खेतमा रोपाइँ भइसकेको हुन्थ्यो । तर यस वर्ष पानी पर्याप्त मात्रामा नपर्दा दोलखामा ३४ प्रतिशत क्षेत्रमा मात्रै रोपाइँ भएको पाइएको छ। पानी पर्याप्त नपर्दा धान खेतीयोग्य जमिनमा नै धान रोप्न नसकिएको जिल्लाका किसानहरूले बताउन थालेका छन् ।
गत वर्ष असार तेस्रो सातासम्म करिब ५५ प्रतिशत खेतमा रोपाइँ सकिएको थियो तर यस वर्ष भने,सिचाइ अभाव तथा समयमै वर्षा नहुँदा हालसम्म जम्मा ३४.४ प्रतिशत बेसीमा मात्रै रोपाइँ भएको पाइएको छ ।
जिल्लाभर ३४.४ प्रतिशत धान रोपाइँ हुँदा मुख्य धान खेती हुने मेलुङ गाउँपालिकामा हालसम्म ४४.५ प्रतिशत रोपाइँ सकिएको कृषि ज्ञान केन्द्र रामेछापको सम्पर्क कार्यालय दोलखाका कृषि अधिकृत नन्दराज ओलीले बताए ।
