काठमाडौँ- निर्वाचन आयुक्तमा सिफारिस कृष्णमान प्रधान विरुद्ध संसदीय सुनुवाइ समितिमा चार वटा उजुरी परेका छन् । उनीविरुद्ध यौन दुर्व्यवहारको उजुरी परेको हो ।
स्रोतका अनुसार इच्छाविपरीत यौन सम्पर्क गरेको भन्दै एक महिलाले उजुरी दिएकी छन् । अन्य उजुरी पनि सोही आरोपसँग सम्बन्धित रहेका छन् । नेपाल कानून आयोगको कार्यकारी निर्देशक हुँदा प्रधानले इच्छाविपरीत यौन सम्पर्क गरेको भन्दै ती महिलाले उजुरी दिएकी हुन् । समितिले प्राप्त उजुरीहरू समितिका सदस्यहरूलाई वितरण गरेको छ । बिहीबार समितिले उजुरीकर्तासँग छलफल गर्ने भएको छ । शुक्रवार प्रधानको सुनुवाइ छ ।
२४ भदौ २०८० मा पीडित महिलाले काठमाडौँ जिल्ला अदालतमा यौन दुर्व्यवहारको मुद्दा दर्ता गरेकी थिइन् । २९ भदौ २०८० मा अदालतमा दुवै पक्षबिच मिलापत्र भएको थियो । दबाब र प्रभावमा मुद्दा मिलापत्रमा टुंग्याएको भन्दै महिलाले प्रधानलाई निर्वाचन आयुक्त बनाउन उपयुक्त नहुने भन्दै समितिमा उजुरी दिएकी हुन् ।
असार २ मा बसेको संवैधानिक परिषद्को बैठकले प्रधानलाई निर्वाचन आयोगको आयुक्तमा नियुक्ति सिफारिस गरेको थियो । संसदीय सुनुवाइ समितिले प्रधान विरुद्ध ७ असारमा १० दिन समय दिएर उजुरी आह्वान गरेको थियो ।
