काठमाडौँ- नेकपा एमालेका अध्यक्ष केपी शर्मा ओलीले शिक्षकहरू गुणस्तरका नहुँदा धेरै विद्यार्थीहरू एसइईमा फेल भएको बताएका छन् ।
एमालेको भ्रातृ संगठन अनेरास्ववियु रुपन्देहीले एसइईमा ३.६ देखि माथिको जिपिए ल्याउने विद्यार्थीलाई सम्मान गर्न आयोजना गरेको कार्यक्रममा ओलीले शिक्षकका कारण नतिजा खस्किएको टिप्पणी गरेका हुन् ।
शिक्षकहरूमा आफूभित्र भएको ज्ञान प्रदान गर्ने सीप नहुँदा धेरै विद्यार्थीहरू फेल भएको ओलीले बताए । ‘अब शिक्षकहरूमा भएको ज्ञानलाई विद्यार्थीले बुझ्ने गरी प्रदान गर्ने सीप बढाउनुपर्छ’, ओलीले भने ।
एसइईमा नन ग्रेड नतिजा आएका विद्यार्थीहरूले दिने पूरक परीक्षाको तयारीका लागि निःशुल्क अनलाइन कक्षा सञ्चालन गर्ने ओलीले बताए ।
त्यस्तो निःशुल्क अनलाइन कक्षा कसले सञ्चालन गर्ने भन्ने ओलीले स्पष्ट पारेनन् । ‘मुख्यगरी अंग्रेजी, गणित, विज्ञान र सामाजिक विषयमा धेरै विद्यार्थीहरू एसइई परीक्षामा अनुत्तीर्ण हुनुभएको छ, अहिले अनुत्तीर्ण भए पनि पूरक परीक्षामा पास बनाउने गरी हामीले निःशुल्क अनलाइन कक्षा सञ्चालन गर्दै छौँ त्यसमा जोडिन सबै विद्यार्थीहरूलाई मेरो आग्रह छ’, ओलीले भने ।
२०८० चैत १५ गतेदेखि सञ्चालन भएको एसइई परीक्षामा ननग्रेडमा परेका र अनुपस्थित भएका सबै परीक्षार्थीहरूका लागि राष्ट्रिय परीक्षा बोर्डले साउन २३ गतेदेखि २९ गतेसम्म पूरक परीक्षा तोकेको छ ।
सोही परीक्षालाई लक्षित गरेर फेसबुक पेज र अनलाइन मार्फत निः शुल्क कक्षा सञ्चालन गर्न लागिएको ओलीले बताए ।
