काठमाडौं– लगातारको मनसुनी वर्षाका कारण बढेको जल सतहका कारण देशकै लामो नदी कर्णालीमा उच्च खतरा कायमै छ ।
डोटीको ठूलीगाढमा कर्णालीले खतरा तह पार गरेको छ । जल तथा मौसम विज्ञान विभागले ठूलीगाड जलमापन केन्द्रमा कर्णाली नदी खतराको तहमाथि रहेको जनाएको छ ।
जहाँ निर्धारित खतराको तह ६.५ मिटर निर्धारण गरिएको छ । तर, आइतबार अपरान्ह पौने ६ बजेसम्म पनि ठूलीगाड जलमापन केन्द्रमा कर्णालीको जल सतह ८.७६ मिटरमा छ ।
कर्णाली नदीको बहाव बढिरहेकाले अझै पनि खतरा उच्च रहेको विभागले जनाएको छ । उक्त स्थानमा कर्णालीको सतर्कता तह ५.५ मिटर छ ।
तर अन्य नदीमा भने पानीको बहाव विस्तारै ओरालो लाग्दै गएको छ । महाकालीमा पनि पानीको बहाव ओरालिन थालेको छ ।
पारीगाउँ मापन केन्द्रमा अहिले पानीको बहाव ६.६७ मिटर छ। जहाँ सतर्कताको तह ५.८० मिटर हो । यहाँ पानीको बहाव अहिले स्थिर रहे पनि खतरा टरिनसकेको विभागले जनाएको छ ।
यता नारायणी नदीमा पनि पानीको बहाव स्थिर छ । नारायणीको देवघाट मापन केन्द्रमा अहिले पानीको बहाव ७.५६ मिटरमा छ । यहाँ सतर्कता तह ७.३ मिटर हो । नारायणीमा खतराको तह पानी ९ मिटरमा पुगेपछि मानिन्छ । अहिले यहाँ पनि पानीको बहाव स्थिर रहेको विभागले जनाएको छ । तर खतरा भने अझै टरिसकेको छैन ।
नारायणीको सहायक नदी रुद्रबेनी (गुल्मी) पनि अझै सतर्कता तहमाथि नै छ । रूद्रबेनीमा अहिले पानीको बहाव ३.८६ मिटरमा रहेको छ । यो नदीमा पानीको बहाव स्थिर रहे पनि खतराको जोखिम कायमै रहेको विभागले उल्लेख गरेको छ ।
सप्तकोशीमा पनि पानीको बहाव स्थिर रहेको विभागले जनाएको छ । सप्तकोशीमा आइतबार बिहान ५६ वटै ढोका खोलिएको थियो। तर त्यहाँ पनि अहिले पानी चेतावनी तहबाट तल रहेको विभागले जानकारी दिएको छ।
