काठमाडौं– प्रधानमन्त्री पुष्पकमल दाहाल ‘प्रचण्ड’ ले असार १७ गते मध्यराति दुई ठूला दलहरुबीच भएको सहमतिबारे नेकपा एमालेका अध्यक्ष केपी शर्मा ओलीले ढाँटेको खुलासा गरेका छन् ।

प्रतिनिधिसभाको शुक्रबारको बैठकमा विश्वासको मत माग्नुअघि आफ्नो धारणा राख्दै उनले नेपाली कांग्रेससँग सहमति गरिसकेपछि पनि ओलीले आफूलाई सहमति नभएको भन्दै ढाँटेको खुलासा गरेका हुन् ।

‘दुई दलको सहमति भइसक्यो । हस्ताक्षर भइसक्यो । म त्यो कथा सबै कथा अहिले भन्न चाहन्न । १७ गते राति सहमति भइसकेपछि १८ गते बिहान आएर नेकपा एमालेका अध्यक्ष आएर भन्नुहुन्छ, भएकै छैन भन्नुभयो । म कान्तिपुर देखाउँछु, यी फोटो आइसकेको छ, तपाईं र शेरबहादुरजीले हस्ताक्षर गरेको, के कुरा गरेको तपार्इंले ?’, उनले सोधे, ‘कहिलेको फोटो रहेछ भन्नुभयो उहाँले । ढाँटछलको पनि एउटा सीमा हुन्छ नि । अनि शेरबहादुरजीलाई फोन गरेर तीन वटा पार्टी बस्ने हो, अनिमात्र के गर्ने हो गर्ने हो भन्नुहुन्छ उहाँले राष्ट्रिय सहमति ।’

उनले त्यसबेला नेपाली कांग्रेसका सभापतिलाई फोन गर्दा नलागेको बताए । ‘तत्काल देउवाजीलाई फोन लागेन । एकछिन पछि लाग्यो । के हो, एमाले अध्यक्षले त सहमति भएको छैन, तीनटा नेता बसेर टुंग्याउने भन्दै हुनुहुन्छ मलाई दिउँसो ४ बजे’, मैले सोधेँ, ‘अनि सभापतिले मलाई भन्नुभयो, होइन सहमति भइसक्यो, हस्ताक्षर भइसक्यो । म ढाँट्न जान्दिन, सरी । र, यो तीनटा बस्न आवश्यक छैन । तीनटा बसेर अब के गर्नु ? भइसक्यो, भइसक्यो भन्नुभयो उहाँले आफ्नो शैलीमा । यस्तो तरिका अपनाउनु पर्छ ? दुईटा ठूल्ठूला दलहरुले ?’