काठमाडौँ - गत शुक्रबार सिमलतालबाट लेदोसहितको पहिरोले बगाइ त्रिशूलीमा हराइरहेका ६५ जना यात्रुको नाम जिल्ला प्रशासन कार्यालय चितवनले सार्वजनिक गरेको छ ।
सार्वजनिक गरिएको सङ्ख्याका आधारमा हेर्दा काठमाडौँबाट गौर जान आएको एञ्जल यातायातको बागमती प्रदेश०३-००१ख २४९५ नम्बरको बसमा ४ जना महिला र २३ जना पुरुष रहेका थिए । वीरगञ्जबाट काठमाडौँतर्फ आइरहेको बागमती प्रदेश ०३-००६ख १५१६ नम्बरको गणपति डिलक्स बसमा ५ महिलासहित ३८ जना सवार रहेको नाम सार्वजनिक भएको छ । गणपति डिलक्सका ३ यात्रुले भने त्रिशूलीमा खसेको बसबाट पौडिएर ज्यान बचाएका थिए ।
चितवनका सहायक प्रमुख जिल्ला अधिकारी खिमानन्द भुसालले आज बेलुका सार्वजनिक गरेको विवरणमा आफन्तले दाबी गरेका, बसको यात्रु चलानीमा उल्लेख भएका यात्रुका विवरण छन् । सार्वजनिक विवरण अनुसार १० जना भारतीय नागरिक भएको उल्लेख गरिएको छ । यद्यपि केही विवरणमा अझै अन्यौलता रहेको चितवनका सहायक प्रमुख जिल्ला अधिकारी चिरञ्जीवी शर्माले बताएका छन् ।
जिल्ला प्रशासन कार्यालयले जारी गरेको विवरण अनुसार सोमबार दिनभर खोजी गर्दा एउटा थप मात्रै थप शव भेटिएको छ । भने, दुईवटै बस र बाँकी ५१ जना यात्रुको अहिलेसम्म पत्ता लागेको छैन ।
प्रहरीले भेटाएको मध्ये १४ जनाको शव मध्ये ७ जनाको पहिचान खुलेर आफन्तले जिम्मा लिइसकेका छन् भने बाँकी ७ जनाको पहिचान खुलेको छैन । शुक्रबार भरतपुर २९ सिमलतालमा दुई वटा गुडिरहेको बसलाई पहिरोले बगाएर त्रिशूलीमा पुर्याएपछि सोही दिनदेखि तालिमप्राप्त गोताखोरसहितको टोलीले लगातार खोजी गरेका छन् ।
खोजीमा सहयोग हुने प्रविधिसहित खोजी कार्य जारी भए पनि लेदोसहितको धमिलो पानी र पानीको उच्च बहाबका कारण खोजी कार्यमा कठिनाइ भएको खोजीमा संलग्न उद्धार कर्मीहरूको भनाइ छ ।
प्रकाशित मिति: मंगलबार, साउन १, २०८१ ०६:१७
प्रतिक्रिया दिनुहोस्
