साउन १५ गतेसम्म प्रतिनिधि सभाका ६ वटा बैठक सञ्चालन गर्ने

काठमाडौँ- आगामी साउन १५ गतेको अवधिमा ६ वटा प्रतिनिधि सभा बैठक सञ्चालन गर्ने निर्णय भएको छ ।

सिंहदरवारमा सभामुख देवराज घिमिरे र प्रमुख सचेतकहरुबीचको छलफलमा ६ वटा बैठक सञ्चालन गर्ने र ती बैठकलाई प्रभावकारी बनाउने समझदारी जुटेको हो । सत्तापक्षका मुख्य सचेतक महेश बर्तौलाका अनुसार साउन ६ गते एमाले अध्यक्ष केपी शर्मा ओलीले विश्वासको मत लिनेछन् ।

सो दिनसहित लगातार साउन ७ र ८ गते पनि बैठक बस्नेछ । त्यसपछि भने ९, १० र ११ गते संसदीय समितिको बैठक बस्नका लागि समय प्रदान गरिने जानकारी दिँदै बर्तौलाले १३, १४ र १५ गते फेरि संसद् बैठक बस्ने गरी बिहीबारको बैठकमा समझदारी जुटाइएको बताए ।

यस्तै ६ वटा बैठकमा कुन विधेयकहरू कुन दिन पेश गर्ने भनेर प्राथमिकता पनि तय गरिएको उनले बताए । शुक्रबार कार्यव्यवस्था परामर्श समितिको बैठकबाट निर्णयलाई अनुमोदन गरेर अघि बढिने उनको भनाइ छ ।

यस्तै समितिका २ सभापति मन्त्री भइसके पनि रिक्त रहेका पदमा चाँडो पूर्णता दिन सम्बन्धित दललाई आग्रह गर्नेबारे पनि बैठकमा छलफल भएको छ ।