काठमाडौं – भारतले प्रशान्त महासागरमा अवस्थित द्विपराष्ट्र मार्शल आइल्याण्डलाई पूर्वाधार निर्माणमा सहयोग गर्ने भएको छ । यसबारे दुई मुलुकबीच समझदारीपत्रमा हस्ताक्षर भएको छ ।
हस्ताक्षर समारोहमा भारतीय विदेशमन्त्री एस जयशकंरले प्रशान्त क्षेत्रमा रहेका मुलुकहरुको प्राथमिकता र आवश्कतालाई भारतले महत्व दिएको बताएका छन् । विदेशमन्त्री जयशकंरले प्रशान्त क्षेत्रका मुलुकहरुसँग सहकार्य गर्न भारत सदैव तत्पर रहेको पनि उल्लेख गरेका छन् ।
भारतीय टेलिभिजन डब्लूआईओएनले जनाएअनुसार भारतले उक्त मुलुकमा सामुदायिक पूर्वाधार, खेलकुद केन्द्र, विमानस्थल टर्मिनललगायतको निर्माणमा सहयोग गर्नेछ । त्यसबाहेक भारतले पानी शुद्धीकरण र स्वास्थ्य सेवामा पनि सहयोग गर्ने जनाइएको छ ।
भारतले हिन्द प्रशान्त क्षेत्रमा अवस्थित मुलुकसँगको सहकार्य विस्तार गरिरहेका बेला पछिल्लो समझदारीपत्रमा हस्ताक्षर भएको हो ।
