काठमाडौं - ग्लोबल टी–२० क्यानडा लिग अन्तर्गत आफ्नो तेस्रो खेलमा भ्यानकुभर नाइट्सले मोन्ट्रियल टाइगर्सविरुद्ध पहिले फिल्डिङ गर्ने भएको छ । टस जितेर भ्यानकुभरले पहिले फिल्डिङ गर्ने निर्णय गरेको हो ।
यसअघिका दुवै खेलमा गुमाएको भ्यानकुभरले आज पहिलाे जितकाे खाेजीमा हुने छ । ६ टोली सहभागी प्रतियोगितमा भ्यानकुभर पाँचौ स्थानमा छ । आजको खेलमा पनि नेपालका लेग स्पिनर सन्दीप लामिछाने र अलराउन्डर दीपेन्द्र सिंह ऐरी प्लेइङ –११ मा छन् ।
यसअघि शनिबार साँझ भएको खेलमा बंगला टाइगर्स मिसिसाउगाविरुद्ध पहिले बलिङ गरेको भ्यानकुभर २२ रनले पराजित भएको थियो ।
उक्त खेलमा नेपाली राष्ट्रिय क्रिकेट टोलीका लेग स्पिनर लामिछानेले दुई विकेट लिए थिए । पुरै चार ओभर बलिङ गर्दा उनले ३२ रन खर्चिएर दुई विकेट हात पारेका हुन्। ब्याटिङतर्फ दीपेन्द्र भने चल्न सकेनन्। २ बलको सामना गरेका उनले १ रन मात्र जोडे। ब्याटिङतर्फ नटआउट रहेका सन्दीपले तीन बलको सामना गर्दै २ रन जोडे।
भ्यानकुभरले टस जितेर पहिले बलिङ रोजेपछि सुरुमा ब्याटिङ गरेको बंगला टाइगर्सले ७ विकेटको क्षतिमा १५३ रनको चुनौती दिएको थियो। उसका लागि इफ्तिखार अहमदले अर्धशतक बनाए। ४० बल खेलेका उनले नटआउट ५० रन बनाउन ६ चौका र एक छक्का प्रहार गरे।
सन्दीप र दीपेन्द्र सहभागी टिम भ्यानकुभरका लागि हर्ष ठाकरले नटआउट शानदार अर्धशतक बनाए पनि जितका लागि त्यो पर्याप्त भएन। उनले ६७ बलको सामना गर्दै तीन चौका र पाँच छक्काको सहयोगमा ७९ रन बनाए। अन्य कुनै पनि ब्याट्सम्यानले टिकेर नखेल्दा भ्यानकुभरले लगातार दोस्रो खेल गुमाउनु परेको हो। पूरै २० ओभर खेलेको भ्यानकुभरले ६ विकेटको क्षतिमा १३० रन मात्र बनाउन सक्यो।
भ्यानकुभरको पहिलो खेल
पहिलो खेलमा भ्यानकुभर टोरन्टो नेसनल्ससँग ८ विकेटले पराजित भएको थियो।
भ्यानकुभरले दिएको १ सय ११ रनको लक्ष्य टोरन्टोले १४.४ ओभरमा २ विकेटको क्षतिमा भेट्टाएका थियो। टोरन्टोका कप्तान कोलिन मुन्रोले बनाएको ४४ रन नै टोलीका लागि सर्वाधिक रह्यो।
सन्दीपले आफ्नो स्पेलमा २९ रन खर्चेर १ विकेट लिएका थिए। ब्याटिङ तर्फ भ्यानकुभर ३ बल अगावै १ सय १० रन बनाउँदा अलआउट भएको थियो। रेजा हेन्रिक र मुनिर अहमदले समान २३ रन सन्दीपले १५ रन बनाएका थिए।
