गएको आर्थिक वर्ष चेक बाउन्स गर्ने तथा कर्जा नतिर्ने ५२ हजार ३०३ व्यक्ति तथा संस्था कालोसूचीमा परेका छन् । कर्जा सूचना केन्द्रका अनुसार आर्थिक वर्ष २०८०/८१ मा कर्जा नतिरेका कारण १२ हजार ८२१ ऋणीलाई कालोसूचीमा राखिएको छ ।
यस्तै ३९ हजार ४८२ जना चेक बाउन्स गरेका कारण कालोसूचीमा परेका छन्। कालोसूचीमा पर्नेमा चेक बाउन्स र ऋणी दुवैको संख्या निकै नै बढिरहेको केन्द्रले जनाएको छ।
विगतका तुलनामा कर्जा नतिरेका कारण कालोसूचीमा पर्नेको संख्या कम हुने गरे पनि अहिले बढेको हो।
अघिल्लो आव २०७९/८० मा ऋण नतिर्ने र चेक बाउन्स गर्ने ३४ हजार ८१ व्यक्ति तथा संस्था कालोसूचीमा परेकोमा गत आव २०८०/८१ मा ५२ हजारभन्दा बढीलाई कालोसूचीमा राखिएको केन्द्रले जनाएको छ ।
गत आवमा सबैभन्दा बढी असारमा कालोसूचीमा थपिएका थिए । गत असारमा मात्रै ६ हजार ४८२ जना कालोसूचीमा परेका थिए । जुन गत आवकै सबैभन्दा बढी भएको केन्द्रले जनाएको छ।
