द्रूतमार्गको अर्को सुरुङ ‘ब्रेक थ्रू’, प्रधानमन्त्रीले भने- देश नयाँ युगमा प्रवेश गर्दैछ
मकवानपुर- प्रधानमन्त्री केपी शर्मा ओलीले राष्ट्रिय गौरवको काठमाडौँ–तराई-मधेस द्रूतमार्ग आधुनिक विकासको नमुना साबित हुने बताएका छन् ।
नेपाली सेनाद्वारा निर्माणधीन द्रूतमार्गको घट्टेपाँखा–धेद्रे सुरुङ छिचोल्ने कार्यक्रमलाई सम्बोधन गर्दै उनले नेपाल सुरुङ युगसँगै नयाँ युगमा प्रवेश गरेको बताए ।
अब यो विकास निर्माणको गति निरन्तर अघि बढ्ने उनले उद्घोष गरे । मकवानपुरको बकैया गाउँपालिका–१२ धेद्रेस्थित काठमाडौँ–निजगढतर्फको एक दशमलव सात सय २८ किमी लामो सुरुङ आज ‘ब्रेक थ्रु’ भएको हो ।
‘विगतमा जुन रफ्तारमा विकास हुनुपर्थ्यो, त्यो हुन सकेन । अब विकासको नमुनाका रुपमा यो द्रूतमार्ग बन्नेछ । यस मार्गलाई अघि बढाउने सन्दर्भमा देखिएका राजनीतिक र आर्थिक बाधा ब्यवधानलाई समाधान गर्न सरकार तत्पर छ’, उनले भने । ओलीले नेपालमा केही भएन भन्ने भाष्य खडा गर्न खोजिए पनि द्रूतमार्गको सुरुङ निर्माणले त्यसलाई खण्डन गरेको बताए ।प्रधानमन्त्री ओलीले ‘समृद्ध नेपाल, सुखी नेपाली’ को राष्ट्रिय आकाङ्क्षा पूूरा होस् भन्ने दृष्टिकोणले सरकारले काम गरिरहेको उल्लेख गरे ।
डिजिटल नेपाल फ्रेमवर्कबमोजिम अप्टिकल फाइबर, फोरजी इन्टरनेटलगायतका सेवा सबै जिल्लामा पुर्याउने काम अघि बढिरहेको बताउँदै प्रधानमन्त्री ओलीले द्रूतमार्गलगायतका पूर्वाधार विकासले यस्ता कार्यक्रमलाई सहयोग मिल्ने बताए ।
द्रूतमार्ग वि.सं. २०८३ चैत मसान्तसम्म बनाइसक्ने लक्ष्य लिइएकाले सम्बन्धित मन्त्रालय र निकायकालाई त्यहीअनुसार काम गर्न ओलीले निर्देशन दिए ।
