एजेन्सी– अमेरिकामा सत्तारुढ डेमोक्रेटिक पार्टीका तर्फबाट आगामी राष्ट्रपति उम्मेदवार कमला ह्यारिसले चुनावी जोडी रोजेकी छिन् ।
हाल उपराष्ट्रपति समेत रहेकी कमलाले मिनेसोटाका गभर्नर टिम वाल्जलाई आगामी कार्यकालका लागि उपराष्ट्रपति उम्मेदवार चुनेकी हुन् ।
विद्युतीय सामाजिक सञ्जाल एक्समा कमलाले लेखेकी छिन्, ‘टिम वाल्जलाई आफ्नो चुनावी दौडका जोडी बनाउन पाउँदा म खुशी छु । मैले टिमलाई यसबारे भनेकी थिएँ । मेरो टिममा उनकाे उपस्थिति हुनु ठूलो कुरा हो ।’
हाइस्कूलमा शिक्षक र फूटबल कोच रहेका टिम वाल्ज १२ वर्षदेखि अमेरिकी कंग्रेसमा प्रतिनिधि छन् । उनले आफू उपराष्ट्रपति उम्मेदवारका रूपमा चयन हुनु जिन्दगीकै सबैभन्दा ठूलो सम्मान भएको बताएका छन् ।
अमेरिकी कंग्रेसकी पूर्व स्पीकर न्यान्सी पोलेसीले कमला ह्यारिसको यस फैसलाको स्वागत गरेकी छिन् । उनले एक अन्तर्वार्तामा डेमोक्रेटिकको टीम शानदार बनेको बताएकी हुन् ।
न्यान्सीले हालै रिपब्लिकनका उम्मेदवार डोनाल्ड ट्रम्प र जेडी वान्सको जोडीलाई अचम्मलाग्दो भनेकी थिइन् । न्यान्सीको यो प्रतिक्रियालाई लिएर अमेरिकाभर चर्चा भएको थियो ।
रिपब्लिकन पार्टीले पनि कमला ह्यारिसले गरेकी उपराष्ट्रपति उम्मेदवार चयनलाई लिएर सामाजिक सञ्जालमा कटू आलोचना गर्न थालेको छ । सो पार्टीका नेता/कार्यकर्ताहरूले टिम वाल्जलाई कट्टर वामपन्थी संज्ञा दिइरहेका छन् ।
