सशस्त्र प्रहरीको सफलताः त्रिभुवन विमानस्थलमा समात्यो साढे सात किलो कोकिनसहित व्यक्ति
काठमाडौं– बिमानस्थल सुरक्षामा खटिएको सशस्त्र प्रहरी बलको टोलीले भन्सारसँगको सहकार्यमा अन्तर्राष्ट्रिय विमानस्थलबाट एक विदेशी नागरिकलाई पक्राउ गरेको छ भने साढे ७ किलो लागु औषध कोकिन जफत गरेको छ।
दोहाबाट कतार एअरवेजको उडान नम्बर क्युआर ६४४ मा सोमबार राती सवा १ बजे विमानस्थल आइपुगेका ५१ वर्षे ल्याटिभियन नागरिक इभार्स भाल्टर्सले लुकाएर ल्याएको साढे ७ केजी कोकिन जफत गरिएको बताइएको छ।
भाल्टर्सका साथमा रहेको ह्याण्डब्यागभित्र राखिएको सिरानीमा शंका लागेपछि चेकजाँच गर्दा पहेँलो रंगको चकलेट आकारभित्र पाउडर थियो। पक्राउ गरिएका व्यक्ति र जफत गरिएको कोकिनलाई नेपाल प्रहरीको लागु औषध ब्युरोमा अनुसन्धानसहित चेकजाँचका लागि बुझाइएको छ।
पछिल्लो समय सशस्त्र प्रहरी बलले विमानस्थल सुरक्षाका निम्ति जनशक्ति थप गरेको थियो।
प्रकाशित मिति: बुधबार, साउन २३, २०८१ ११:१७
प्रतिक्रिया दिनुहोस्
