काठमाडौं– सत्ता साझेदार नेपाली कांग्रेसले प्रधानमन्त्री शेख हसिनाले मुलुक छाड्नु पर्ने गरी बंगलादेशमा भएको घटनाको असर नेपालमा पर्न नदिन सरकारलाई सचेत गराएको छ ।
ललितपुरको सानेपामा बुधबारदेखि सुरु भएको केन्द्रीय कार्यसमिति बैठकले बंगलादेशको घटनाको असर नेपालमा पर्न नदिन सरकारलाई सचेत गराएको हो ।
‘बंगलादेशमा पछिल्लो समय विकसित घटनाक्रमको सम्बन्धमा नेपाली कांग्रेसले बंगलादेशी नागरिकको भावना बमोजिम चाडै नै त्यहाँ शान्ति स्थापना हुने र लोकतान्त्रिक प्रकृया सुचारु ढंगले अघि बढ्ने विश्वास लिएको छ,’ बैठकपछि जारी वक्तव्यमा भनिएको छ, ‘यो घटनाबाट नेपाली विद्यार्थी र अन्य नेपाली नागरिकलाई कुनै असर पर्न नदिन नेपाल सरकारले थप तदारुकता राख्ने विश्वास बैठकले लिएको छ ।’
बैठकमा केन्द्रीय सदस्य एवम् परराष्ट्रमन्त्री डा. आरजु राणा देउवाले बंगलादेश, बेलायत, इजरायल, लेवनानमा पछिल्लो समय विकसित घटनाक्रमका साथै त्यहाँ रहेका नेपालीहरूसँग नियमित सम्पर्कमा रहिरहेको जानकारी गराएकी थिइन् ।
