काठमाडौँ- नेपाली काँग्रेसका नेता अर्जुननरसिंह केसीले अहिलेसम्मका ठूला भ्रष्टाचार काण्डको छानबिन गर्न पूर्वप्रधान न्यायाधीशको नेतृत्वमा उच्चस्तरीय आयोग बनाउन प्रस्ताव गरेका छन् ।
आइतबार पार्टीको केन्द्रीय समितिको बैठकमा बोल्ने क्रममा नेता केसीले चर्चित र नीतिगत भ्रष्टाचार काण्डहरूको छानबिन गर्न सर्वशक्ति सम्पन्न उच्चस्तरीय न्यायिक आयोग गठन गर्न प्रस्ताव गरेका हुन् । उच्चस्तरीय आयोग बनाउन पहकदमी काँग्रेसले लिनुपर्ने केसीको जोड थियो ।आजसम्म चर्चित र नीतिगत भ्रष्टाचार काण्डहरूको छानबिन गर्न कुनै पूर्वप्रधान न्यायाधीशको नेतृत्वमा सर्वशक्ति सम्पन्न उच्चस्तरीय न्यायिक आयोग गठन गर्न काँग्रेसले नै पहलकदमी गरोस् । उनले भने ।
पार्टी दुर्बल हुँदा लोकतन्त्र कमजोर हुने उल्लेख गर्दै केसीले निश्चित विधि, पद्धति र प्रक्रियाभित्र रहेर गुट-उपगुट, गिरोह उपगिरोहभन्दा माथि उठ्न र एकताबद्ध बनाउन सभापति शेरबहादुर देउवालाई आग्रह गरे ।
केसीले पार्टीमा पारित भएका प्रस्तावहरू कति कार्यान्वयन भए भनी नेतृत्वसँग जवाफ मागे । ‘१४ औँ महाधिवेशनसम्मका यस्ता धेरै पारित प्रस्तावहरू कति कार्यान्वयन भए, किन भएनन्, अब कसरी गर्ने ?’ केसीले प्रश्न गरे,‘यसको कार्यान्वयन संयन्त्र निश्चित भएन भने यो निरर्थक कागजको खोस्टो मात्र हुन्छ ।’
केसीले मुख हेरी दण्ड र पुरस्कार होइन कसुर हेरी दण्ड र क्षमता हेरी पुरस्कारको व्यवस्था गर्नुपर्ने बताए । ‘हरेक क्षेत्रमा गणतन्त्र (मेरिटोक्रेसी) भन्दा आफ्ना मानिसलाई पुरस्कारतन्त्र हाबी देखिएको छ । यसले जनमानसमा चरम निराशा उब्जाएको छु’, उनले भने ।
