काठमाडौं - साफ यू२० च्याम्पियनसिपको फाइनलमा बंगलादेशले नेपालविरुद्ध सुरुवाती अग्रता लिएको छ ।
सातदोबाटोस्थित एन्फा कम्प्लेक्सको मैदानमा बंगलादेश पहिलो हाफमा १-० ले अघि छ । नेपालले आक्रामक सुरुवात गरेपनि २४ मिनेटमै खेलाडी परिवर्तन गरेपछि पकड गुमाउन पुग्यो ।
नवौं मिनेटमा निराजन धामीले ३५ यार्ड टाढाबाट गरेको प्रहार गोलरक्षक मोहमद आसिफले मुस्किलले पन्च गरे । त्यसपछि कर्नरमा नेपालले गोलरक्षकलाई समस्या दिन सकेन ।
२१ औं मिनेटमा नेपालले अग्रता लिने अवसर गुमायो । बंगलादेशका गोलरक्षक एक अर्कासँग जुधेर लडेपछि निराजनले बल अघि बढाए । उनले पेनाल्टी क्षेत्रको बायाँ भागबाट दिएको क्रसलाई अभिनाश स्याङतानले पोस्टको दिशा दिन सकेनन् ।
पहिलो हाफको इन्ज्युरी समयमा बंगलादेशले अग्रता लियो । मिराजुल इस्लामले पेनाल्टी क्षेत्रको ठिक बाहिरबाट फ्रिकिकमा उत्कृष्ट गोल गरे । उनको फ्रिकिक टप कर्नरमा लाग्दै गोल भएको थियो ।
