काठमाडौँ- मार्क्सवादी ज्ञान केन्द्रको चौथो साधारण सभा तथा दोस्रो अधिवेशनले पुनः मनहरि तिमिल्सिनाको अध्यक्षतामा १७ सदस्यीय केन्द्रीय कार्यसमिति चयन गरेको छ ।
आज सम्पन्न अधिवेशनमा वरिष्ठ उपाध्यक्षमा इन्द्रराज भट्टराई, उपाध्यक्षमा रेशमकुमार अधिकारी, महासचिवमा हुमनाथ न्यौपाने, उपमहासचिवमा दुस्यान्त भट्टराई, सचिवमा सागर अधिकारी र कोषाध्यक्षमा राधिका ओझालाई चयन भएका छन्।सदस्यमा भीमप्रसाद सुवेदी, भूपनारायण यादव, त्रिविक्रम ज्ञवाली, सीता कडरिया, टीका ओली, डा शङ्कर खतिवडा, आस्था घिमिरे, राजुराम सार्की भुल, मीनादेवी नेपाल र लक्ष्मण गुरुङ चयन भएका छन्।
यस्तै, सभाले ज्ञान केन्द्रका विभाग प्रमुख र प्रदेश अध्यक्षसमेत चयन गरेको छ । अध्यक्ष तिमिल्सिनाले ज्ञान केन्द्रले वैचारिक कामलाई थप सशक्त ढंगले अगाडि बढाउने प्रतिबद्धता जनाए । नवनिर्वाचित कार्यसमितिले मार्क्सवादी विचार निर्माणमा महत्त्वपूर्ण योगदान गर्ने, केन्द्रप्रतिको अपेक्षा तथा भरोसालाई जीवन्त राख्ने क्रियाशील हुने प्रतिबद्धता व्यक्त गरे ।
कार्यक्रममा नेपाल कम्युनिष्ट पार्टी (माओवादी केन्द्र) की नेतृ एवं पूर्व मन्त्री रेखा शर्माले कम्युनिष्ट पार्टीले नयाँ पुस्तालाई गहिरो ढंगले राजनीतिकरण गर्न नसकेको, मार्क्सवादी दर्शन तथा वैचारिक रूपमा उभ्याउन नसकिरहेको अवस्थामा ज्ञान केन्द्रको प्रयास निकै सराहनीय रहेको बताए।
