इंग्ल्यान्ड – विश्व क्रिकेटमा इंग्ल्यान्डको नयाँ युग खराब ढङ्गले चलेको छ। गएको तीन महिनामा इंग्ल्यान्डले अस्ट्रेलियासँग लगातार दोस्रो हारको सामना गरेको छ। जुन महिनामा बारबाडोसको ओभलमा ३६ रनको हार सहेको इंग्ल्यान्डले हम्पसायरमा २८ रनको हार खाएको हो। अस्ट्रेलियाले बनाएको १७९ रनको जवाफमा ब्याटिङ गरेको इङ्गल्यान्ड १५१ रनमा सीमित भएको हो।
कप्तान फिल साल्ट तथा प्रशिक्षक मार्कस ट्रेस्कोथिकको साथमा मैदानमा उत्रेको इंग्ल्यान्डका लागि फेरि एक पटक अस्ट्रेलियाका ट्रेभिस हेड घातक भए। हेडले २३ बलमा ८ चौका र ४ छक्काको सहयोगमा ५९ रन जोडे। उनले म्याथ्यु सर्टसँग मिलेर पहिलो विकेटका लागि ८६ रनको साझेदारी गरे। सर्टले ४१ रन जोडे।
१८० रनको लक्ष्य पछ्याएको इंग्ल्यान्ड ४ बल बाँकी रहँदा १५१ रनमा सीमित भएको हो। इंग्ल्यान्डलाई कम योगफलमा सीमित गर्ने क्रममा सियोन एबोटले ३.२ ओभरमा २८ रन खर्चेर ३ विकेट लिए। इंग्ल्यान्डका लियाम लिभिङस्टोनले २७ बलमा ३७ रन प्रहार गरे। यसैगरी कप्तान साल्टले १२ बलमा २० रन जोडे।
वर्षाको कारण टस ढिला भएको खेलमा अस्ट्रेलियाले सुरुवात गरे जस्तो शानदार ढङ्गले पारीको अन्त्य गर्न सकेन। पहिलो पावर प्लेकै एक बल बाँकी रहँदा बिना कुनै विकेटको क्षति ८६ रन जोडेको अस्ट्रेलियाले त्यसपछि ९३ रन जोड्दै बाँकी १० विकेट गुमाएको हो। ३ बल बाँकी रहँदा नै अस्ट्रेलिया अल आउट भएको थियो।
२०० रनको आँकडा पार गर्ने गतिमा अघि बढी रहेको अस्ट्रेलियालाई रोक्ने क्रममा स्पिनर अदिल रसिद र लियामस्टानले गरेका थिए।
रसिदले चार ओभरमा २३ रन खर्चेर १ विकेट लिए। लिभिङ स्टोनले ३ ओभरमा २२ रन खर्चेर ३ विकेट लिए। यी २ स्पिनर जम्नु अघि हेड र सर्टले पहिलो ३५ मध्यका १५ बलमा छक्का या चौका प्रहार गरेका थिए।
