स्पेनिस ला लिगामा एट्लेटिको मड्रिडले भ्यालेन्सियामाथि सहज जित हात पारेको छ ।
घरेलु मैदानमा भएको खेलमा एट्लेटिको मड्रिडले भ्यालेन्सियालाई ३-० गोलअन्तरले पराजित गरेको हो । एट्लेटिको मड्रिडको जितमा कोनोर गल्लाघेर, एन्टोनी ग्रिजमन र जुलियन अल्भारेजले गोल गरे ।
खेलको ३९औँ मिनेटमा गल्लाघेरले गोल गर्दै एट्लेटिको मड्रिडलाई सुरुवाती अग्रता दिलाएका थिए । पहिलो हाफमा १-० को अग्रता लिएको एट्लेटिको मड्रिडले दोस्रो हाफमा थप दुई गोल गरेको थियो । खेलको ५४औँ मिनेटमा ग्रिजमनले गोल गर्दै एट्लेटिको मड्रिडको अग्रता दोब्बर पारेका थिए ।
त्यसपछि दोस्रो हाफको इन्जुरी समयको चौथो मिनेटमा अल्भारेजले गोल गरेपछि एट्लेटिको मड्रिड भ्यालेन्सियामाथि ३-० गोलअन्तरको जित निकाल्न सफल भएको हो । वैकल्पिक खेलाडीका रूपमा मैदान प्रवेश गरेका अल्भारेजले एट्लेटिको मड्रिडको जर्सीमा पहिलो गोल गरेका हुन् । त्यसका लागि अल्भारेजले पाँचौँ खेलसम्म पर्खिनुपर्यो ।
जितपछि एट्लेटिको मड्रिड ५ खेलबाट ११ अंकका साथ लिगको दोस्रो स्थानमा उक्लिएको छ । शीर्ष स्थानमा रहेको बार्सिलोनाको समान खेलबाट १५ अंक छ । ५ खेलबाट ११ अंक जोडेको रियल मड्रिड भने लिगको तेस्रो स्थानमा छ । पराजित भ्यालेन्सिया ५ खेलबाट १ अंकका साथ लिगको पुछारमा छ ।
