स्पेनिस क्लब रियल म्याड्रिडले युइएफए च्याम्पियन्स लिगमा विजयी सुरुवात गरेको छ । रियलले मंगलवार जर्मन क्लब भिएबी स्टुडगार्डलाई ३-१ गोलले पराजित गरेको हो ।
घरेलु मैदानमा भएको खेलमा रियललाई जित दिलाउन केलियन एमबाप्पे, एन्टोनियो रुडिगर र एन्ड्रिक समान गोल गरे । स्टुडगार्डका लागि डिनिज अन्डाभले १ गोल फर्काए ।
४६औं मिनेटमा एमबाप्पेको गोलमा रियलले अग्रता लिएको थियो । रोड्रिगोको पासमा एमबाप्पेले गोल गरेका थिए । स्टुडगार्डका लागि ६८औं मिनेटमा जेमी लेवेलिंगको असिस्टमा अन्डाभले बराबरी गोल फर्काए ।
८३औं मिनेटमा लुका मोड्रिडको पासमा रुडिगरले गोल गरेपछि रियलले दोस्रो पटक खेलमा अग्रता लियो । इन्ज्युरी समयमा एन्ड्रिकले गोल गर्दै रियलको जित निश्चित गरे।
च्याम्पियन्स लिगमा भएका अन्य खेलमा बायर्न म्युनिख, लिभरपुल, स्पोर्टिङ सिपी, युभेन्टस र एस्टन भिल्लाले विजयी पनि विजयी सुरुवात गरेका थिए ।
रियल म्याड्रिडले अब च्याम्पियन्स लिगमा अर्को खेल अक्टोबर ३ मा फ्रेन्च क्लब लिलीसँग खेल्ने तालिका रहेको छ । त्यस्तै भिएफबी स्टुट्टगार्टले अर्को खेल अक्टोबर १ मा स्पार्ट प्राहसँग खेल्ने तालिका रहेको छ ।
