काठमाडौं– भारतको बेंगलुरुमा चार दिन अघि पत्ता लागेको नेपाली महिलाको हत्या प्रकरणको अनुसन्धानमा नयाँ तथ्य फेला परिरहेको बताइएको छ।

प्रहरीले मुख्य संदिग्ध व्यक्तिको पहिचान गरेको छ र बेंगलुरुको मल्लेश्वरममा रहेको उनको एउटा बेडरूमको अपार्टमेन्टमा फ्रिजमा टुक्राटुक्रा गरिएको शव फेला परेपछि २९ वर्षीया एच. महालक्ष्मी दास को कथित हत्यामा ठूलो अनुसन्धान सुरु गरेको छ।

प्रहरीले घटनाको छानबिन गर्न ६ वटा टोली बनाएर अनुसन्धान गरिरहेको छ ।

कर्नाटकका गृहमन्त्री जी परमेश्वराले स्थितिलाई सम्बोधन गर्दै भने, ‘पुलिसले धेरै जानकारी र सुरागहरू सङ्कलन गरेको छ। एक व्यक्ति संलग्न भएको विश्वास गरिएको छ, तर हामी थप प्रमाणहरू जम्मा नगरेसम्म पुष्टि गर्न सक्दैनौं। कथित रूपमा उनी पश्चिम बंगालका हुन्।

परमेश्वरले जनतालाई आश्वस्त पार्दै बेंगलुरुमा महिला सुरक्षाका लागि पहिले नै महत्त्वपूर्ण सावधानी अपनाएको र सरकार सावधान रहेको पनि बताएका छन्।

बेंगलुरु शहरका पुलिस आयुक्त बी दयानन्दले पनि मिडियालाई सम्बोधन गरेर भने,‘केस सबै कोणबाट अनुसन्धान भइरहेको छ। मुख्य अभियुक्तको पहिचान भइसकेको छ र उनलाई पक्राउ गर्ने प्रयास भइरहेको छ।’

सेप्टेम्बर २१ मा डरलाग्दो खोज भएको थियो, जब स्थानीयहरूले अपार्टमेन्टबाट दुर्गन्ध आएको उजुरी प्रहरीलाई गरेका थिए। 

अनुसन्धानका क्रममा प्रहरीले महालक्ष्मीको शवका ३० वटा टुक्रा फ्रिजभित्र फेला पारेको थियो। 

रेफ्रिजरेटरको छेउमा नीलो सुटकेस पनि फेला  पारिएको थियो। शंकास्पद व्यक्तिले शव सार्न खोजेको हो वा अर्को स्थानबाट सारिएको हो कि भनेर प्रश्नहरू खडा भएपछि त्यसलाई पनि प्रहरीले क्लुका रुपमा प्रयोग गरेको थियो।

शव फेला परेको करिब पाँच दिनअघि महालक्ष्मीको हत्या भएको प्रहरीको अनुमान छ। 

प्रहरी, अनुसन्धानमा खटिने कुकुर र फोरेन्सिक विज्ञसहित घटनास्थलमा प्रमाण जुटाउन गएको थियो। 

एउटा प्रारम्भिक उजुरी (एफआईआर) दर्ता गरिएको छ र अनुसन्धान जारी छ। केही टोलीहरू थप सुराकहरूको खोजीमा अन्य राज्यहरूमा पठाइएको छ।

रिपोर्टका अनुसार महालक्ष्मीको परिवार मूलतः नेपालको हो तर ३५ वर्षअघि कर्नाटकको नेलमंगलामा सरेको थियो। उनी बेंगलुरुमा जन्मिएकी थिइन्।

उनी बेंगलुरुको एउटा कपडा पसलमा काम गर्थिन्। महिलाको पोष्टमार्टम भइसकेको र अनुसन्धानका क्रममा रिपोर्ट आउन बाँकी छ।

यसक्रममा महालक्ष्मीको पतिसँग सम्बन्ध राम्रो नरही एक बर्षदेखि अलग बस्ने गरेको पनि जनाइएको थियो।

(भारतीय सञ्चार माध्यमहरूको सहयोगमा)