गुल्मी - बडादशैंको नवौं दिन आज विभिन्न मन्दिर तथा शक्तिपीठहरुमा पूजाआराधना गर्नेहरुको घुइँचो लागेको छ ।
मुसिकोट, इस्माकोट, धुर्कोट, अर्जै, चारपाला दरवार, उजुङ्गकोट, जोगिथुम, चोयगा, शान्तिपुर, अर्जुन भगवती, तम्घास लगायतका स्थानका मन्दिरहरुमा पूजा गर्नेहरुको बिहानैदेखि भिडभाड छ । ती मन्दिरहरुमा पञ्चबलीसहित पूजा गरे मनोकांक्षा पूरा हुने विश्वास छ ।
दर्शनार्थीहरु र देशविदेशबाट घर फर्किनेहरुको चहल-पहलले गुल्मीका अधिकांश बस्तीहरुमा दशैंको रौनक बढेको छ । यद्यपि विगतका वर्षहरुको तुलनामा गाउँमा उल्लास भने छैन । बढ्दो बसाइँसराइका कारणले गाउँमा जनघनत्व घट्दै गएकाले पनि दशैंको उल्लास कम हुँदै गएको छत्रकोट ३ निवासी जनक पन्थ बताउँछन् ।
इस्मा २ निवासी चुराबहादुर थापा युवा जति विदेश र गाउँमा वृद्ध–वृद्ध र बालबालिकाहरु मात्रै भएकाले अघिल्ला वर्षहरुको तुलनामा मन्दिरमा मानिसहरुको उपस्थिति कम हुने गरेको बताउँछन् ।
दशैंको टीकाको दिनदेखि पूर्णिमासम्म गुल्मीका गाउँहरुमा सरायँ नाच देखाउने गरिन्छ । खुँडा, खुकुरी र तरवार फन्नाउँदै पञ्चेबाजाको तालामा सामूहिक रुपमा सराय नाच नाचिन्छ ।
गुल्मी जिल्लाका अर्जै, अम्मरपुर, इस्मामैदान, धुर्कोट, उजुङ्गकोट, जोगिथुम, ताल्तुङ्ग, धागिथुम, चोयगा, चन्द्रकोट लगायतका स्थानमा सराय नाच नाचिन्छ । तर केही वर्षयता सराय नाच पनि संकटमा पर्दै जान थालेको छ ।
