काठमाडौँ -चाडपर्वको बेलामा अत्यधिक माग हुने तास विभिन्न मुलुकबाट आयात गरिने भन्सार विभागको तथ्यांकले देखाउँछ । रमाइलो तथा जुवाको रूपमा पैसाको लेनदेन गरी खेलिने तास आयातमा नेपालबाट करोडौँ रुपैयाँ बाहिरिने गरेको छ ।

चालु आर्थिक वर्षको पहिलो दुई महिनामा मात्रै ६ करोड ११ लाख ६४ हजार रुपैयाँ बराबरको तास आयात भएको छ । विभागका अनुसार २० लाख ७ हजार ८९२ थान तास आयात भएको हो तास आयात गरे बापत ३ करोड ५२ लाख ८५ हजार रुपैयाँ राजस्व उठेको छ ।नेपालमा दसैंतिहारलगायत चाडपर्वमा तास खेल्ने गरिन्छ । सोही अवधिलाई लक्षित गरी तास आयात हुने गरेको छ । गत आर्थिक वर्षको साउन र भदौमा ६ करोड ४४ लाख ८४ हजार रुपैयाँको तास आयात भएको थियो । जसबाट ४ करोड ४ लाख ३३ हजार रुपैयाँ राजस्व उठेको थियो । नेपालमा चीन, भारत, अमेरिका, बेलायत लगायत मुलुकबाट तास आयात हुने गरेको छ ।

चालु आर्थिक वर्षको साउन र भदौमा सबैभन्दा बढी चीनबाट ५ करोड २१ लख ३ हजार रुपैयाँको तास आयात भएको विभागको तथ्यांक छ । उस्तै भारतबाट ९० लाख ५७ हजार रुपैयाँ बराबरको तास आयात भएको छ ।

विभागका अनुसार आर्थिक वर्ष ०८०/०८१ म ३२ करोड १८ लाख ८७ हजार रुपैयाँ बराबरको तास आयात भएको थियो । सबैभन्दा बढी चीनबाट २८ करोड २३ लाख ४६ हजार रुपैयाँ र भारतबाट २ करोड ६८ लाख ७१ हजार रुपैयाँ बराबरको तास आयात भएको थियो । अमेरिकाबाट ९५ लाख २२ हजार र स्पेनबाट २८ लाख ५९ हजार रुपैयाँ बराबरको तास आयात भएको विभागको तथ्यांक छ ।

आर्थिक वर्ष ०७९/०८० मा २१ करोड २७ लाख ९४ हजार रुपैयाँको तास आयात भएको थियो । सबैभन्दा बढी चीनबाट १८ करोड ७६ लाख, भारतबाट २ करोड १५ लाख ९५ हजार र ब्राजिलबाट ३५ लाख ७९ हजार रुपैयाँको तास आयात भएको विभागले जनाएको छ । आर्थिक वर्ष ७८/७९ मा २१ करोड ५४ लाख ४५ हजार रुपैयाँको तास आयात भएको थियो ।

आर्थिक वर्ष ०७७/०७८ मा २८ करोड ६२ लाख ६४ हजार रुपैयाँको तास आयात भएको थियो भने आर्थिक वर्ष ०७६/०७७ मा २३ करोड ५४ लाख ५३ हजार रुपैयाँको तास आयात भएको थियो ।