काठमाडौं- अदार पूनावाला नेतृत्वको चर्चित भारतीय खोप निर्माता कम्पनी सेरेन प्रोडक्सनले करण जोहरको धर्मा प्रोडक्सनमा एक हजार करोड भारु लगानी गर्दै ५० प्रतिशत हिस्सेदार बनेको छ ।
यो सहमतिपछि अब धर्मा प्रोडक्सनमा पूनावालको ५० प्रतिशत हिस्सा हुनेछ भने जोहरको ५० प्रतिशत स्वामित्व हुने भारतीय सञ्चारमाध्यमले जनाएका छन् ।
कार्यकारी अध्यक्षको रूपमा जोहरले कम्पनीको रचनात्मक दृष्टिकोणको नेतृत्व गर्नेछन् । अपूर्व मेहताले मुख्य कार्यकारी अधिकारीको रूपमा करणसँग रणनीतिक दिशा निर्देशन र संगठनको परिचालन उत्कृष्टताको निरीक्षण गर्न काम गर्नेछन् ।
पछिल्लो समय भारतको मनोरञ्जन उद्योगले बढ्दो विश्वव्यापी सान्दर्भिकताको साथ डिजिटल र अन्य धेरै प्लेटफर्ममा उच्च गुणस्तरको सामग्री खोज्ने दर्शकीय आकांक्षालाई लक्षित गर्दै दायरा विस्तार गरिरहेको छ ।
बलिउड हंगामा लेख्छ- ‘सेरेन प्रोडक्सन र धर्माबीचको यो रणनीतिक साझेदारी अदार पूनावालाको रणनीतिक कुशाग्रता र धर्माको समृद्ध विरासतलाई संयोजन गर्दै अवसरको फाइदा उठाउन डिजाइन गरिएको हो ।’
यो मर्जरबाट उन्नत प्रविधि र शैलीलाई एकीकृत गर्दै गुणस्तरीय कन्टेन्ट सिर्जना, निर्माण, वितरण र दर्शकको थप संलग्नताको लक्ष्य राखिएको छ ।
साझेदारीको बारेमा टिप्पणी गर्दै धर्मा प्रोडक्सनका कार्यकारी अध्यक्ष जोहरले भने, ‘आफ्नो स्थापनाकालदेखि नै धर्मा प्रोडक्सन भारतीय संस्कृतिको सारलाई स्पर्श गर्ने हृदयस्पर्शी कथावाचन परम्पराको पर्यायवाची भएको छ । मेरो बुबाले दिगो प्रभाव छोड्ने फिल्म सिर्जना गर्ने सपना देख्नुभयो र मैले मेरो करिअरलाई त्यो दृष्टिकोण विस्तार गर्न समर्पित गरेको छु । मेरा घनिष्ट मित्र अदार एक असाधारण दूरदर्शी र आविष्कारसँग हामी सामेल छौं । हामी धर्माको विरासतलाई नयाँ उचाइमा उठाउन तयार छौं ।’
दुई कम्पनी मिलेपछि धर्मा प्रोडक्सनको बजार मूल्य दुई हजार करोड भारु पुगेको जनाइएको छ ।
