काठमाडौं- प्रधानमन्त्री केपी शर्मा ओलीले हतियार कसरी बिसाउन लगाउनुपर्छ आफूले जानेको भन्दै नेकपा माओवादी केन्द्रका अध्यक्ष पुष्पकमल दाहाल प्रचण्डलाई जवाफ फर्काएका छन् ।
आइतबार काठमाडौँमा गैर आवासीय नेपाली संघको कार्यक्रमलाई सम्बोधन गर्ने क्रममा उनले यस्ताे बताएका हुन् ।
शनिबार नेकपा माओवादी केन्द्रका अध्यक्ष प्रचण्डले पार्टीको विरोधसभालाई सम्बोधन गर्दै ‘हामीले हतियार मात्रै बिसाएका हौँ, चलाउन बिर्सेका छैनौं’ भन्दै दिएको अभिव्यक्ति दिएका थिए ।
साेकाे जवाफ फर्काउँदै ओलीले भने ‘हिजो एक जन उफ्रिउफ्रिकन भाषण गर्दै थिए। हिजो मात्रै हो। हतियार बिसाएको मात्रै हो। भ्रम नरहोस्। चलाउन बिर्सिएको छैन। त्यस्तै त्यस्तै त हामी हुनु भएन नि। धम्क्याएका भरमा खाने, म त्यसलाई फेरि हतियार कसरी बिसाउन लगाउनुपर्छ तरिका थाहा छ पनि नभनौँ। हामी चलाउन त चलाउँदैनौँ तर बिसाउन लगाउन जानेको छ हामीले। कसरी बिसाउने भनेर,’।
