काठमाडौँ- अहिले सामाजिक सञ्जालमा नेपाली महिला खेलाडी साबित्रा भण्डारीले भारतीय खेलाडीको फुटबल बुटमा चुम्बन गरेको भिडियो भाइरल भइरहेको छ । नेपालले भारतविरुद्ध जित निकालेपछि साबित्राले भारतीय खेलाडी बाला देवीको बुटमा चुम्बन गरेकी थिइन् ।

साबित्राले सन् २०१४ देखि आफ्नो फुटबल करियर सुरु गरेको थिइन् । उनले फुटबल करियर सुरु गर्दा दक्षिण एसियामा बाला देवी निकै चर्चित र गोल गर्न एकदम माहिर थिइन् । आफ्नो फुटबल करियरसँगै उनले बाला देवीलाई आइडलको रूपमा लिने गरेकी थिइन् ।

३४ वर्षिय बाला देबी व्यवसायिक रूपमा सम्झौता गरेर विदेशी लिग खेल्ने पहिलो भारतीय महिला हुन् । उनी सन् २०२० को जनवरी स्कटिस क्लब रेन्जर्स एफसीसंग आबद्ध भएकी थिइन् । यसका साथै, उनी भारतीय महिला फुटबलका लागि सबैभन्दा धेरै गोल गर्ने खेलाडी पनि हुन् । उनले भारतका लागि अहिलेसम्म ५१ गोल गरिसकेकी छिन् ।

केही समय अगाडीसम्म उनी दक्षिण एसियाको सबैभन्दा धेरै गोल गर्ने महिलाको सुचीमा थिइन् । तर उनलाई नै आइडल मान्ने साबित्राले उनलाई पछि पारिसकेकी छिन् । साबित्रा अहिले ४८ खेलमा ५५ गोल गर्दै दक्षिण एसियाको सर्वाधिक गोल गर्ने सूचीमा रहेकी छिन् ।

आफ्नो आइडललाई पछि पारे पनि उनी बाला देवीलाई निकै सम्मान गर्ने गर्छिन् । उनी भन्छिन्, ‘मैले करियर सुरु गर्दा दक्षिण एसियामा बालादेवी नाम निकै चर्चित थियो । उनलाई नै हेरेर मैले नेपालका लागि फुटबल खेलिरहेको थिए । 

भारतको मणिपुरमा जन्मेकी बाला देवी अहिले आफ्नो करियरको अन्तिम क्षणमा रहेकी छिन् । उनले भारतका साथै दक्षिण एसियाली फुटबलका लागि ठुलो योगदान दिएकी छिन् ।

दक्षिण एसियाका नयाँ पुस्ताका महिला खेलाडीलाई उई गोल गर्न एकदम मन पर्छ । त्यसैले उनी सुरुवाती चरण देखि नै मेरो लागि आइडल हुन् ‘उनले विदेशी लिगको बाटो समेत देखाउन सफल भएकी छिन् । उनी समग्र दक्षिण एसियाका लागि प्रेरणा स्रोत हुन् । त्यसैले पनि साबित्राले उनको फुटबल बुटमा सम्मानको रूपमा चुम्बन गरेकी हुन् ।