काठमाडौं- दशैंतिहारका लागि विदेशबाट अर्बौँका खानेकुरा भित्रिने गरेका छन् । नेपालीको दोस्रो ठूलो चाडका रुपमा परिचित तिहारलाई लक्षित गर्दै भारत, चीन र तेस्रो मुलुकबाट अर्बौँका खानेकुरा भित्रिएका छन् ।

चाडवाड भड्किलो बन्दै जाँदा नेपालको घाटा पनि दिनदिनै चुलिँदो छ । नेपाली परम्परामै नभएको भाइमसला अहिलेको तिहारमा अत्यावश्यक बनिसकेको छ । भाइमसलाका लागि मात्रै नेपालको बर्षेनि अर्बौँ रुपैयाँ बाहिरिने गरेको छ ।

यस पटकको तिहारलाई लक्षित गरेर एक अर्ब ११ करोड सात लाख रुपैयाँ बराबरको भाइमसला अर्थात ड्राइफ्रुट्स आयात गरिएको छ ।

चालु आर्थिक वर्ष २०८१/०८२ को तीन महिनामा मात्रै त्यतिका परिमाणको सामान आएको हो । भन्सार विभागका अनुसार भाइमसलामा हालिने काजु, बदाम, ओखर पेस्ता, नरिवल, छोकडा किसमिस त्यतिका परिमाणमा आयात भएका हुन् ।

भन्सार विभागको तथ्यांकअनुसार तिहारलाई लक्षित गरी सबैभन्दा धेरै काजु आयात गरिएको छ । काजु मात्रै तीन महिनामा २६ करोड एक लाख रुपैयाँ बराबरको २ लाख ९८ हजार ९४६ किलो आयात विभागको तथ्यांकमा उल्लेख छ ।

त्यसैगरी यही तीन महिनाको अवधिमा २० करोड ९८ लाख ३९ हजार रुपैयाँको ६ लाख ७ हजार २ सय २५ केजी ओखर आयात भएको छ । यस्तै, १८ करोड ५९ लाख ५८ हजारको २ लाख ३२ हजार ६९३ किलो बदाम आयात भएको छ ।

विभागका अनुसार १० करोड ६१ लाख ६१ हजार रुपैयाँको तीन लाख २४ हजार ६ सय ७५ किलो किसमिस आयात भएको छ ।

तीन लाख २० हजारको नरिवल, दुई लाख रुपैयाँको कटुस, एक करोड ४५ लाखको पेस्ता, एक करोड ३० लाखको छोकडा पनि आयात भएको छ ।