रामपुर (पाल्पा)- पाल्पाको रामपुर नगरपालिकामा नेवाः समुदायको सांस्कृतिक संग्रहालय निर्माण सुरु भएको छ । नेवारी समुदायको कला संस्कृतिको जगेर्ना गर्न नेवाः समाज रामपुर पाल्पाले भवन निर्माणको थालनी गरेको हो ।
रामपुर नगरपालिका-४ स्थित गैराबारीमा करिब एक रोपनी क्षेत्रफलमा तीनतले भवनसहितको संग्रहालय निर्माण सुरु गरिएको नेवाः समाज रामपुरका अध्यक्ष बाबुराम श्रेष्ठले बताए । नयाँ पुस्तालाई पुराना मौलिक कला संस्कृतिबारे अवगत गराउन सङ्ग्रहालय बनाउन थालिएको अध्यक्ष श्रेष्ठ बताए ।संग्रहालय निर्माणका लागि संघीय र प्रदेश सरकारबाट रकम विनियोजन भएको छ । दुई चरणमा गरेर संरचना निर्माणको काम सक्ने योजनाका साथ निर्माणको काम अघि बढाइएको छ ।
पहिलो चरणमा संघीय सरकारबाट विनियोजन भएको रु. १८ लाख र जनश्रमदान गरी रु. २१ लाख १७ हजार चार सय ९६ बराबरको रकमबाट भवन निर्माण हुनेछ भने दोस्रो चरणमा लुम्बिनी प्रदेश सरकारबाट विनियोजित रु २५ लाखको काम ठेक्काबाट हुने नेवाः समाजका सचिव विमल श्रेष्ठले जानकारी दिए । चालु आर्थिक वर्षमा रु. ४६ लाख १७ हजार चार सय ९६ बराबरको रकमबाट काम हुने बताइएको छ ।
परम्परागत रूपमा चलनचल्तीमा आएका कला, संस्कृतिलाई लोप हुन नदिन नेवाः समाजले गरेको यस कार्यले नयाँ पुस्ताले आफ्नो संस्कृतिबारे धेरै जानकारी पाउनेछन् ।
यहाँ निर्माण हुन लागेको संग्रहालयमा नेवार समुदायको मात्र नभई अन्य जातजाति, समुदायमा प्रचलित संस्कृतिलाई समावेश गरेर राख्ने समाजले जनाएको छ । पहिलो तलामा सभा हल, दोस्रो तलामा संग्रहालय र तेस्रो तलामा कार्यालय भवन रहनेछ ।
लुम्बिनी प्रदेशसभा सदस्य तथा लुम्बिनी प्रदेशका अर्थ, उद्योग तथा पर्यटन समितिका सभापति राजुप्रसाद श्रेष्ठले कला संस्कृतिको संरक्षणका लागि संग्रहालयले रामपुरको सांस्कृतिक पर्यटन विकासमा महत्त्वपूर्ण टेवा पुग्ने बताए ।
भवनको शिलान्यास प्रदेश सभा सदस्य श्रेष्ठले गरेका हुन् । रामपुरमा रहेका नेवाः समुदायले आफ्नो मौलिक संस्कृति जोगाउने अभियानमा जुटेको छ । यस आयोजनाबाट सात सय जना लाभान्वित हुने समाजले जनाएको छ ।
